Бүгүҥҥүттэн “Бүлүүгэ – Саха театрын күннэрэ” гастрол тэрээһиннэрэ саҕаланнылар

Бүгүн кулун тутар 14 күнүгэр Былатыан Ойуунускай аатынан Саха академическай театрын дириэктэрэ Петр Тимофеевич Макаров Бүлүү улууһун аҕа баһылыгын Сергей Николаевич Винокуровы кытары көрүстэ. Кэпсэтиигэ Сергей Николаевич: “Култууратын, духуобунаһын өрө туппут норуот биллэр кэмэ кэллэ” диэн бэлиэтээтэ, Бүлүү улууһугар култуураҕа, духуобунаска, үөрэхтээһиҥҥэ улахан болҕомто уурулларын сырдатта.

Көрсүһүү түмүгүнэн Бүлүү улууһун дьаһалтата уонна Саха академическай театра бииргэ үлэлэһии туһунан сөбүлэҥ түһэрсиини кэпсэттилэр. Бүлүү улууһун дьаһалтата олохтоох чулуу дьонун ааттарын-суолларын үйэтитэр үлэни ыытан, сакааска пьесалары суруйтаран, Саха театрын сыанатыгар саҥа испэктээкиллэр тахсалларыгар үбүнэн-харчынан өйүүрүн биллэрдэ, бүгүҥҥү кэпсэтиини инники үлэтин былааныгар киллэрдэ

Санатан эттэххэ бүгүн киэһэ М.Н. Жирков аатынан Култуура дыбарыаһыгар Саха норуодунай суруйааччыта Николай Якутскай дьон-сэргэ киэҥ биһирэбилин ылбыт айымньытынан “Төлкө” испэктээкил буолуоҕа.

🎫 https://sakhatickets.ru
📲 +7 (984) 105-96-73