Уус Алдан улууһун дьаһалтата Саха театрын труппатын ытыс үрдүгэр түһэрэн маанылаан далбардаан көрүстэ.

Кулун тутар 28 күнүгэр 19 чааска В.В. Никифоров-Күлүмнүүр аатынан “Тойон Мүрү” култуура дыбарыаһыгар И.Алексеев “Суоһалдьыйа Толбонноох” испэктээкилэ саалаҕа толору мустубут көрөөччүлэр дохсун ытыстарын тыаһынан доҕуһуолланна. Уус Алдан улууһун аҕа баһылыга Алексей Васильевич Федотов уонна Саха театрын дириэктэрэ Петр Тимофеевич Макаров хардарыта эҕэрдэ, махтал суруктары туттарыстылар.

 Испэктээкил кэнниттэн көрөөччүлэри кытары сэһэргэһии буолла. Көрөөччүлэр Театр күнүнэн эҕэрдэлээтилэр, Саха театрын испэктээкиллэригэр сыһыаннаах ыйытыылары биэрдилэр. Төрөөбүт тылбыт сүтэр кутталга үктэммит кэмигэр Саха театра сахалыы уус-уран тылы харыстаан илдьэ сылдьарыгар махтаннылар. Аныгыскы гастролга маастар-кылаастары көрдөрөргүт буоллар диэн баҕа санааларын эттилэр.

 Гастрол бастакы күнэ көрөөччүлэри кытары истиҥ сэһэргэһиинэн түмүктэннэ.