Муус устар 13 күнүгэр Былатыан Ойуунскай аатынан Саха театрыгар драматург Утум Захаров САССР, ССРС, РСФСР көҥүл тустууга үтүөлээх тириэнэрэ Дмитрий Петрович Коркин төрөөбүтэ 95 сылыгар анаан суруйбут “Андаҕар” пьесатын тула аһаҕас кэпсэтии буолла.

Кэпсэтиигэ Саха театрыттан дириэктэр Петр Макаров, дириэктэри солбуйааччы Анатолий Николаев, драма ааптара Утум Захаров, туруорааччы режиссер Сергей Потапов кытыннылар. Ону тэҥэ СӨ Култуураҕа уонна духуобунаска министиэристибэтин идэтийбит искусство уонна духуобунай сайдыы отделын салайааччытын эбээһинэһин толорооччу Саргылана Борисова, Саха норуодунай суруйааччыта Сэмэн Тумат санааларын эттилэр. СӨ спортка миниистирэ Леонид Спиридонов, СӨ сүүмэрдэммит хамаандаларын спортка бэлэмниир киинин дириэктэрэ Михаил Пахомов, Олимпийскай чөмпүйүөн Павел Пинигин, Олипийскай оонньуулар үрүҥ көмүс призердара Александр Иванов, Дмитрий Коркин кэргэнэ Александра Коркина уонна кыыһа Гея Коркина, Спортивнай музейдар уопсастыбаннай сэбиэттэрин бэрэссэдээтэлэ Михаил Друзьянов пьеса туһунан санааларын эттилэр, документальнай пьеса сценаҕа турарыгар сүбэлэринэн-амаларынан көмөлөһөргө бэлэмнэрин биллэрдилэр.

“Андаҕар” пьеса дьиҥ олоххо буолбукка тирэнэн суруллубут уус-уран айымньы, геройдара биһиги кэммит дьоно. Ыҥырыылаах ыалдьыттар бэйэлэрин тус көрүүлэрин, Дмитрий Петрович Коркин уобараһын арыйарга туох алҕастар тахсыбыттарын бэлиэтээтилэр. Пьеса суруллан бүттэҕинэ СӨ спортка министерствотын уонна Саха театрын холбуу бырайыактарынан Саха тустууктарын аан дойду көбүөрдэригэр таһаарбыт улуу тириэнэр аата Саха театрын сценатыгар үйэтитиллэн испэктээкил буолан тахсара былааннанар.