Муус устар 13 күнүгэр Саха театрыгар норуоппут тумус туттар судаарыстыбаннай диэйэтэлин, Саха духуобунай лиидэрин, Саха автономиятын төрүттээччитин, суруйааччы, учуонай Платон Алексеевич Ойуунускай аатын сүгэр тэрилтэлэр салайааччылара Саха театрын дириэктэрэ Петр Тимофеевич Макаров, Литература түмэлин дириэктэрэ Николай Алексеевич Лугинов, Аан дойдутааҕы Дьокуускай аэропорт, Таатта народнай театрын салайааччыта Гаврил Гаврильевич Вырдылин, Чөркөөхтөөҕү судаарыстыбаннас түмэлин дириэктэрэ, Чөркөөх орто оскуолатын дириэктэрэ Святослав Васильевич Сунхалыров буолан Таатта улууһун дьаһалтатын баһылыгын Михаил Михайлович Соровы кытары бииргэ үлэлиир туһунан историяҕа хаалар дириҥ суолталаах сөбүлэҥи түһэристилэр.
Сөбүлэҥ түһэрсиигэ Таатта улууһун дьаһалтатын аҕа баһылыга М.М. Соров Былатыан Ойуунскай аатын сүгэр тэрилтэлэр бииргэ сомоҕолоһон, өйдөрүн, күүстэрин холбоон ыллыктаах үлэ саҕаламмытын бэлиэтээтэ уонна билигин Саха академическай театра, Ойуунускай пааматынньыга турар Орджоникидзе болуоссатыгар Платон Алексеевич Ойуунускай аатын иҥэрии боппуруоһун көтөхтө.
Былатыан Ойуунускай аатынан Таатта народнай театрын аатыттан Тааттатааҕы норуот айымньытын дьиэтин дириэктэрэ Г.Г. Вырдылин саха саарынын Былатыан Ойуунускай аатын болуоссакка иҥэрии үлэ бүтэһик биэс сылга күүскэ барбытын, 4500 илии батааһына хомуллубутун, Саха Өрөспүүбүлүкэтин Ил Дархана Айсен Сергеевич Николаев уонна Дьокуускай куорат баһылыга Евгений Николаевич Григорьев норуоттан этии таҕыстаҕына, бу дьыала кыалларын бэлиэтээбиттэрин иһитиннэрдэ.
Саха народнай суруйааччыта, Былатыан Ойуунускай аатынан литературнай түмэл дириэктэрэ Н.А. Лугинов этиини өйүүрүн, Былатыан Ойууунскай айымньыларын саҥалыы өйдөөн, ааҕар кэм кэлбитин, аан дойду таһымнаах чулуу киһибит айар үлэтигэр учуонайдар өттүлэриттэн иҥэн-тоҥон дириҥник чинчийии, ырытар үлэ суоҕун тоһоҕолоон эттэ.
Былатыан Ойуунскай аатынан Саха академическай театрын дириэктэрэ П.Т. Макаров Саха театрын сценатыгар П.А. Ойуунускай айымньыларын туруоран репертуарга киллэрэн, поэзия киэһэлэрин оҥорон кини уоттаах-төлөннөөх санаатын испэктээкиллэр нөҥүө ыччакка тиэрдэри ситиһэргэ кэлэктиип бары өттүнэн өйүүрүн биллэрдэ. Былатыан Ойуунскай аатынан болуоссат баар буоллаҕына, онно кини айымньыларынан турбут испэктээкиллэр уобарастарынан пааматынньыктары туруоран, инникитин кэнэҕэски ыччакка хаалар үйэлээх хамсааһын буоларын бэлиэтээтэ.
Салайааччылар доҕордуу сыһыаны тутуһан инникитин бииргэ үлэлиир докумуоҥҥа илии баттаатылар. Ол кэннэ Былатыан Алексеевич Ойуунскай пааматынньыгар сибэкки ууруутун сиэрэ-туома буолла. Саха норуотугар улахан суолталаах тэрээһин улуу киһибитигэр сүгүрүйүү оһуохайынан түмүктэннэ.
