Бүгүн тыйаатырбыт  сүдү талааннаах артыыһа ЕФИМ СТЕПАНОВ  70 сааһын туолар үбүлүөйдээх күнэ

Бүгүн тыйаатырбыт  сүдү талааннаах артыыһа, Сахабыт тыйаатырын түмэлин төрүттээччи, үгүс көлүөнэ артыыһы иитэн-такайан, көччөх гынан көтүппүт, Сахабыт сирин үтүө-мааны дьоһун дьонун үөрэтэн, көрөн-истэн улаатыннарбыт уһулуччулаах уһуйааччыбыт СӨ норуодунай артыыһа, РФ үтүөлээх артыыһа, СССР уонна РФ Судаарыстыбаннай бириэмийэлэрин лауреата ЕФИМ СТЕПАНОВ  70 сааһын туолар үбүлүөйдээх күнэ.

 

Тыйаатырбыт кутун-сүрүн кэрэһитэ,

Тыйаатырбыт тыынын үтүө иччитэ,

Ытык Киһибит Ефим Николаевич!

Эйигин күн сирин көрбүт кэрэ, бэлиэ күҥҥүнэн,

70 сааскын туолар үөрүүлээх үбүлөйгүнэн

Итиитик-истиҥник эҕэрдэлиибит!

Эн киэҥ-холку көҕүскүнэн, билиигинэн-көрүүгүнэн,

Үтүө майгыгынан элбэх дьон-сэргэ махталын,

Ытыктабылын ылбыт киһи буолаҕын!

Биһиэхэ барыбытыгар үтүө холобур буолаҕыҥ!

Киил мас курдук кытаанах доруобуйаны,

Чэгиэн туругу, күн сиригэр баар бары

Үтүөнү, кэрэни, дьолу-соргуну баҕарабыт.

Чугас дьонуҥ сылаас сыһыаннара, дьон-сэргэ ытыктабыла

Эйигин мэлдьи арыаллаатын, күүскэр күүс эбэ сырыттын диэн

Олоҕуҥ биир бэлиэ күнүнэн, дьоһун кэрдиис кэминэн

Бииргэ үлэлиир үөлээннээхтэриҥ улаханныын-кыралыын,

Эдэрдиин-эмэнниин эйэҕэс эҕэрдэ тылбытын

Эйиэхэ эттэхпит буоллун!

Тус бэйэҥ олоххор тулхадыйбат туруктан,

Ускуустуба киһитин уһунтан уһун үйэлээх,

Умсулҕанннах уйулҕалаах улахан олоҕун олор!

Домм!

 

Сахаҥ тыйаатырын бары дьоно,

Сэтинньи 10 күнэ, 2020 сыл