Былатыан Ойуунускай аатынан Саха театра быйылгы 114- театральнай дьылын гастуруолунан саҕалаата

 

Балаҕан ыйын 11-19 күннэригэр Грознай куоракка Тыйаатыр сылын чэрчитинэн “Федерация” диэн Арассыыйа национальнай тыйаатырдарын I-гы бэстибээлэ буолан ааста. Аныгы Чечня саҥа кэрдиис кэмигэр театральнай бэстибээл сити курдук аан бастаан ыытылынна. “Федерация” бэстибээлгэ Арассыыйа 12 региона кыттыыны ылла: Татарстан, Башкирия, Марий Эл, Карелия, Калмыкия, Адыгея, Кабардино-Балкария, Дагестан, Коми, Хакасия, Чечня уонна Саха Республиката.

Саха сирин театральнай искусствотын, “Федерация” бэстибээл тэрийэр бөлөҕө анал ыҥырыытынан, үбүлээһининэн, Былатыан Ойуунускай аатынан Саха театра аар саарга аатырбыт «Хаарыан хампа күөх кытылым» испиктээкилэ билиһиннэрдэ. Чингиз Айтматов “” сэһэнинэн режиссер Андрей Борисов 1982 с. туруорбут испэктээҕэ бу күҥҥэ дылы көрөөччү кутун-сүрүн тутар эбит диэн тыйаатыр артыыстара бэстибээлтэн сүр көтөҕүллэн, олус астынан кэллилэр.

Петр Макаров, Саха театрын артыыһа: Бэстибээлгэ Саха театрыттан уопсайа 25 киһи буолан баран кэллибит. Чечня туһунан кэпсээтэххэ, сүрдээх чуумпу, бэрээдэктээх, олус ыраас дойду эбит. “Хаарыан хампа күөх кытылым” испэктээҕи Х.Нурадилов аатынан чечен драматическай театрыгар оонньоотубут. Испэктээх олус үчүгэйдик ааста, көрөөччү саалата толору, сөҕүөхтэрин сөхтүлэр, наһаа соһуйдулар. Күнүс икки чааска оонньоон, сол курдук “Федерация” бэстибээли  түмүктүүр үрдүкү чиэскэ тигистибит. Бэстибээл түмүктэнэр үөрүүлээх киэһэтэ Кэнсиэр саалатыгар буолла. Онно барарбытыгар сахалыы таҥаспытын таҥнан, эр дьон сахалыы соммутун кэттибит, кыргыттарбыт маанытык симэнэн, илин-кэлин кэбиһэрдэрин иилиннилэр. Арай ол таҥнан Грознай уулуссатынан хааман истэхпитинэ, дьон-сэргэ таҥаспытын-саппытын көрүү-истии, сөҕүү-махтайыы бөҕөтө. Оттон Кэнсиэр саалатыгар киирэн кэлбиппитигэр 700  миэстэлээх саала тобус-толору дьон, ытыс тыаһа хабылла түстэ, сүрдээх үчүгэйдик көрүстүлэр. Онон Сахабыт сирин театральнай искусствотын, култууратын атын норуоттар олус сэргээтилэр.