Былатыан Ойуунускай аатынан Сахабыт тыйаатыра тапталлаах көрөөччүлэрин бүгүҥҥү бүтүн аан дойдутааҕы Тыйаатыр күнүнэн истиҥник эҕэрдэлиир!!!

Былатыан Ойуунускай аатынан Сахабыт тыйаатыра тапталлаах көрөөччүлэрин бүгүҥҥү бүтүн аан дойдутааҕы Тыйаатыр күнүнэн истиҥник эҕэрдэлиир!!!

Күндү көрөөччүбүт баар буолан, Саха сиригэр тыйаатыр искусствота үрдүк таһымнаахтык сайдан турар.

Көрөөччүбүт таптала баар буолан, артыыс, режиссер, сценограф, көстүүм худуоһунньуга, драматург, билет атыылааччы, көстүмүөр, реквизитор, таҥас-сап тигэр маастар, уоту-күөһү, музыканы туруорар оператордар, режиссер көмөлөһөөччүтэ, бутафор уо.д.а. тыйаатырынан тыынан, «ыалдьан» олорор дьон, бүттүүн тыйаатыр кэлэктиибэ, бука бары, саҥа испэктээкил тахсарын туһугар олохпут тухары буһа-хата үлэлии-хамсыы сылдьабыт.

Саха киһитэ тыйаатырга таптала кыһыҥҥы хараҥа киэһэлэргэ оһох айаҕар уот күлүмнээн умайар көстүүтүттэн, балаҕан эркинигэр күлүк оонньууруттан, олоҥхоһут хомуһуннаах тылыттан-өһүттэн, тойугуттан саҕаланнаҕа… Ону иһийэн истэр, өйүгэр оҥорон көрөр дьоҕурдаах, толкуйдаах саха киһитэ баарын тухары саха тыйаатыра баар буолуо!

Көрөөччүлээх тыйаатыр саҥа чыпчаалларга дьулуһар, оттон тыйаатырдаах омук — сайдар!

Аны саас көрсүөххэ дылы! Саха тыйаатыра көрөөччүтүгэр анаан үгүс прьемераны бэлэмнии сылдьар; Улуу Кыайыы 75-с сылыгар анаан-минээн үгүс испэктээкил тахсыа…

Саха тыйаатыра эһиэхэ бу уустук кэмҥэ биири баҕарыа этэ: чөл буолуҥ, чэгиэн буолуҥ, бөҕө-таҕа буолуҥ!!!

Бэйэ-бэйэҕитин харыстаһыҥ!!! Бэйэ-бэйэбитигэр болҕомтолоохтук сыһыаннаһыаҕыҥ! Ытык кырдьаҕастарбытын тас дойду аргыарыттан хаххалыаҕыҥ!!!