Дириҥ кутурҕаммытын тиэрдэбит Саха Өрөспүүбүлүкэтин үтүөлээх артыыһа Тимофей Тимофеевич Сметанин орто дойдуттан барбытынан 

Саха сирин уопсастыбаннаһа, театральнай эйгэтэ, айар интеллигенцията ыар сүтүктэннэ. Бу дьыл бэс ыйын 22 күнүгэр Саха Өрөспүүбүлүкэтин үтүөлээх артыыһа, «Гражданскай килбиэн» бэлиэ  хаһаайына

Тимофей Тимофеевич Сметанин

80 сааһыгар Орто дойдуттан барбытынан  Былатыан Ойуунускай аатынан Саха академическай театрын коллектива кыргыттарыгар Елена Тимофеевнаҕа, Анджела Тимофеевнаҕа, сиэннэригэр, аймахтарыгар, чугас дьонугар дириҥ кутурҕанын тиэрдэр.

Тимофей Тимофеевич 1966 сыллаахха М.С.Щепкин аатынан үрдүкү театральнай училищены бүтэриэҕиттэн 54 сыл Саха сирин театральнай искусствотыгар бэриниилээхтик сулууспалаабыта, олоҕун бүүс-бүтүннүү таптыыр идэтигэр анаабыта. Саха сирин көрөөччүлэрэ Тимофей Сметанины Саха театрын аатырбыт испэктээкиллэригэр «Ханидуо уонна Халерхааҕа» Саайыра, «Көҥүл итии күнүгэр» Лобенгула, «Хапсыһыыга» Николай Бурҕаат, «Дьадаҥы Дьаакыпка» Дьаакып курдук умнуллубат бөдөҥ оруолларынан киэҥник билэллэр. Тимофей Тимофеевич айар талаанынан  көрөөччүгэ биһирэммит дириҥ толкуйдаах режиссер, ааҕааччы киэҥ араҥатыгар биллибит хомоҕой тыллаах хоһоонньут,  ураты буочардаах тылбаасчыт, кэрэхсэбиллээх инсценировщик этэ.

Тимофей Тимофеевич, быдан дьылларга быраһаай, эн сырдык уобараһыҥ, айар үлэҥ үйэлэр тухары умнуллуо суоҕа.