Эдэр саас: Артыыстар дьиэтээ5и эйгэлэрэ эмиэ кэрэ


Дьоҥҥо биллэр-көстөр дьон үксүгэр тус олохторугар, ол иһигэр тус дьарыктарыгар, куруук бириэмэлэрэ тиийбэт.

Ону өйдүөххэ сөп: саҥа испэктээккэ бэлэмнэнэллэр, киинэҕэ уһуллаллар, гостуруолларга айанныыллар уо.д.а. edersaas.ru Наар үлэ үөһүгэр, дьон-сэргэ ортотугар сылдьар идэлээх Сахабыт тыйаатырын кэрэ аҥаардара дойдуга биллэриллибит өрөбүллэр кэмнэригэр тугунан дьарыктаналларын интэриэһиргээтим. Кинилэри кытары билиҥҥи кэмҥэ күн аайы туттуллар буолбут онлайн-сибээһинэн билсэн, ылбыт эппиэттэрбиттэн бэйэм да астынным. Тоҕо диэтэххэ, кэрэ аҥаардар уонна искусствоҕа чугас, сырдыгы, ырааһы, үйэлээҕи айа-тута сылдьар буолалларынан, дьарыктара – эмиэ кэрэ эйгэтэ эбит!

Маргарита БОРИСОВА, СӨ үтүөлээх артыыската: Маргарита Михайловна дьоҥҥо бэлэх оҥорорун олус сөбүлүүр, Бу дьикти нарын үлэлэр эмиэ бэлэххэ барар кэмнэрэ тиийэн кэлиэхтэрэ турдаҕа… – Биһиги бу бириэмэҕэ гостуруолга сылдьар буоларбыт – артыыс киһиэхэ биир саамай күүтүүлээх уонна долгутуулаах кэммит. Көрөөччүлэрбитин кытары истиҥ көрсүһүү, ыраас салгынынан тыынан, айылҕабыт кэрэ көстүүтүн кытта алтыһарбыт олохпут умнуллубат кэрдиис кэмнэринэн буолаллар. Харантыын саҕаланан, биһиги эмиэ дьиэбитигэр олоробут. Ол эрэн, син биир айар үлэ бара турар – кинигэ ааҕыыта, хоһоон үөрэтиитэ. Ол быыһыгар дьиэҕэ үлэ эмиэ элбэх. Быыспар-арыппар мозаиканан дьарыктанабын, остуолбар уурарга курууһуба ыскаатары саҕалаатым. Гостуруолга да эбитим буоллар, маны барытын илдьэ барбыт буолуом этэ. Уопсайынан, баайар, мозаикалыыр, быысапкалыыр кэмҥэр киһи олус уоскуйар уонна өйүҥ-санааҥ сааһыланар. Элбэх үтүө санаа аргыстаһарыттан биирдэстэринэн, биллэн турар, тыйаатырыҥ буолар. Онон, коронавирус алдьархайа сотору кэминэн ааһарыгар баҕарабын уонна эрэнэбин. Дьэ, оччоҕо бары да үөрэн-көтөн, ахтылҕаннаах тыйаатырбытыгар тиийиэхпит, саҥа испэктээктэрбитинэн көрөөччүлэрбитин үөрдүөхпүт.

Елизавета ПОТАПОВА, СӨ үтүөлээх артыыската: — Бу иллэҥ кэммэр урут бүтэрбэтэх быысапкаларбын ситэриэхтээхпин. Ону таһынан Ольга Ивановна Гуляева үөрэҕинэн, бу паннону хас да сыл тигэн бүтэрбитим, аны ити биэтэhэ хаалла. Сотору тыйаатыр сыанатыгар саҥа үлэ көстүүһү… Аҕа дойду Улуу сэриитигэр Кыайыы 75 сылын көрсө тугу эмэ бэлэмнээбит киhи диэн саныы сырыттахпына, Зоя Петровна: «Аҕаҥ «Очурдаах оҕо сааhым» кинигэтинэн тугу эмэ оноруохха, ол быыhыгар Амма кыргыттарын хоhооннорун киллэриэххэ», – диэн Аммам хоһоонньуттара Саргылаана Гольдерова—Саргы Куо хоhооннорун көрөбүн, Сардана Амгинская хоһооннорун син билэбин, элбэхтик аахпытым. Дьэ, ити курдук, бириэмэ биллибэккэ уонна кылаабынайа, туһалаахтык ааһар.

Лена СЕРГЕЕВА-РУМЯНЦЕВА, РФ, СӨ үтүөлээх артыыската: Лена Диасовна тыйаатырга биир уобараһа «тиллэн» кэлбиккэ дылы… — Дойдуга биллэриллибит өрөбүл кэмигэр биһиги, артыыстар, таах олорбоппут. Оонньообут оруолларбытын хатылыыбыт, оонньуохтаах уобараспытын ырытабыт, тылбытын үөрэтэбит. Арай, үлэлиир кэммитигэр тэҥнээтэххэ, элбэх иллэн бириэмэ баар буолла. Онон, түгэнинэн туһанан, долбуурга үтүө кэмнэри күүтэн турбут кинигэлэри ылан ааҕабын, оонньообут киинэлэрбин, испиктээктэрбин көрөбүн. Ол аайы саҥаттан-саҥа санаалар, толкуйдар киирэллэр. Кэрэ аҥаар буоларым быһыытынан, баайабын, быысапкалыыбын, дьиэ кэргэммэр элбэх бириэмэбин аныырбыттан олус астына сылдьабын.

Надежда УШНИЦКАЯ, СӨ үтүөлээх артыыската: -Саамай үөрэрим диэн, күнү быһа сиэннэрим барахсаттары кытары күн иллэҥэ суох дьарыктанабыт. Кистэл буолбатах, сороҕор сылаталлара ханна барыай? (күлэр). Кырдьыга да, бу күннэргэ кинилэрэ суох олох да тэһийиэ суох эбиппин. Харантыынынан туһанан, саҕалаан баран бүтэрбэтэх икки үлэбин илиибэр ыллым. Тыйаатырбыт син биир үлэлии олорор, ол эбэтэр биһиги, артыыстар, хоһоон, монолог бэлэмниэхтээхпит. Көрөөччүлэрбит биһигини күүтэллэрин сүрэхпинэн сэрэйэбин. Бу ыарахан балаһыанньаҕа бары биир сомоҕо буоллахпытына, саха киһитин сиэринэн, уһуну-киэҥи санаан, бэйэ бодобутун тардына сырыттахпытына, барыта этэҥҥэ буолуоҕар эрэл улахан. Сахабыт тыйаатырын сылаас эйгэтигэр көрсүөххэ диэри! Надежда ЕГОРОВА, “Саха сирэ”, edersaas.ru 3 0 Сайт матырыйаалларын ааптар көҥүлэ суох ылар бобуллар.

© edersaas.ru сайтан: http://edersaas.ru/artyystar-2/