Изабелла Николаева күн сирин көрбүт кэрэ бэлиэ күнэ

Бүгүн Сахабыт тыйаатырын ытык-мааны кэрэ киһитэ, Сахабыт Өрөспүүбүлүкэтин наруодунай артыыската, Российскай Федерация үтүөлээх артыыската Изабелла Васильевна Николаева күн сирин көрбүт кэрэ бэлиэ күнэ.

 

Ытык-мааны күндү киһибит, Иза Васильевна!

Эйигин бүгүҥҥү сымнаҕас хаарынан айхалламмыт үөрүүлээх үбүлүөйгүнэн, айыы сиригэр үктэммит алгыстаах күҥҥүнэн тапталлаах тыйаатырын аатыыттан эдэрдиин-эмэнниин эйэҕэс эҕэрдэ тылбытын аныыбыт, ис-сүрэхпититтэн үөрэн-көтөн сахалыы айхаллыыбыт, урааҥхайдыы уруйдуубут.

         Күндү киһибитигэр кытаанах доруобуйаны, үгүс үөрүүнү, күн сиригэр баар үтүөнү, дьоллоох, уһун олоҕу баҕарабыт. Эн хас биирдии оруолуҥ бэйэҥ  курдук  аһаҕас, амарах, ол курдук үөрүнньэҥ майгыгынан, кыһамньылаах сыһыаҥҥынан бука бары астынабыт, киэн туттабыт, махтанабыт.

        Эдэрдии эйэҕэс дууһаҕынан, булгуруйбат сайаҕас санааҕынан, соргулаах сүбэҕинэн оҕолоруҥ истиҥ мичээригэр, чугас дьонуҥ сылаас сыһыаныгар куустаран үгүс үөрүүлээх күннэн, ускуустуба киһитин уһун уруйдаах олоҕунан олор диэн алгыыбыт! Биһиги бары эйиигин таптыыбыт!

 

Сахаҥ тыйаатырын бары дьоно,

Сэтинньи 12 күнэ, 2020 сыл