Н.Островскай аатынан көрбөттөр кулууптара Саха театрын сыанатыгар

 

Саха театрын артыыстара ханна да сырытталлар театр эйгэтин кэҥэтэ, театр искусствотыгар дьону тарда, түмэ сылдьааччылар. Ол сиэринэн Саха Өрөспүүбүлүкэтин үтүөлээх артыыската Прасковья Адамова Н.Островскай аатынан көрбөттөр кулууптарын кытта алтыһан үлэлээбитэ ыраатта. Кэнники кэмнээҕи үлэлэрин Саха театра өйөөн, театр кыра саалатыгар испэктээкиллэрин оонньуур буоллулар. Онтон испэктээкилгэ кыттааччылар да, көрөөччүлэр да үөрүүлэрэ улахан. Ааспыкка көрбөттөр уопсастыбаларын артыыстара Дмитрий Наумов «Суорумньу» комедиятын Саха театрын артыыстарын кытта бииргэ оонньоон «улахан оскуоланы» барбыттара уонна көрөөччүнү сүрдээҕин сэҥээрдибиттэрэ. Пьеса ааптара бэйэтинэн кэлэн эҕэрдэлээбитэ, махтаммыта умнуллубат түгэн буолбута.

Прасковья Адамова быйыл туруорбут «Алаас ырыата» диэн испэктээкилэ «Туос мааска» диэн норуодунай театрдар күрэхтэригэр лауреат үрдүк аатын ылбыта. Ити Петр Тобуруокап лирическэй пьесата элбэх ырыалаах испэктээкили оҥорорго олус табыгастаах. Онуоха испэктээкилгэ оонньооччулар бары үчүгэй ырыаһыттара сөхтөрдө. Испэктээкилгэ Тыҥкылов үчүгэй куоластаах, талааннаах ыччаты үөрэттэрэр сыаллаах Дьокуускайтан тыа сиригэр тахсар уонна тыа дьоно барахсаттар ырыа аргыстаах үлэни-хамнаһы кыайа туталларыттан, сынньалаҥы сатаан тэрийэллэриттэн сөҕө үөрэр. Куораттан кэлбит ыалдьыкка анаан көрүү кэнсиэрт тэрийэллэр. Тыҥкылов оруолун толорбут, уруккута хор солиһа Роман Березкинтан саҕалаан Петр Андреев (Быллай Баһылай), Елизавета Захарова (Лаглай Даарыйа), Василисса Мартынова (Марфа), Алена Васильева (Елизавета Кириковна), Григорий Дмитриев (Мэник Мэхээс), Евгения Неустроева (Татыйык) куоластаах маанылара эбит. Кинилэр толорууларыгар сахалыы «Оо, тоҕо…», «Мин күнү көрбүтүм…», «Сиргэ таптал, дьоҥҥо таптал», нууччалыы «Я люблю тебя до слез», «Желтые тюльпаны» уо.д.а. ырыалары көрөөччүлэр сүрдээҕин биһирии иһиттилэр. Кэнсиэри кулууп худругун толорбут Туйаара Игнатьева ыытар. Оттон ити кэнсиэри нэһилиэк баһылыгын Алановы толорбут Ибрагим Ишниязов уонна сүрүн оруол Татыйык доҕорун Кешаны оонньообут Лев Васильев көрөллөр.

Бостонуопка толорооччулар бары сүргэлэрэ көтөҕүллэн оонньууллар, олох дьиҥнээхтик долгуйаллар. Ол испэктээкили ураты тыыннаах оҥорор. Бэл сэбиэскэй кэмнээҕи тыа олоҕор баран кэлбит курдук сананан ылаҕын. Ахтыбыт санааҕар алаас ырыатын истибит тэҥэ сүрэхтиин үөрэҕин.

Прасковья Павловна мөлтөхтүк көрөр дьон бэйэлэрин кыахтарын холонон көрөллөрүгэр, талааннарын арыйалларыгар күүс-көмө буоларыттан, кыахтара хааччахтаммыт дьоҥҥо үөрүүлээх түгэннэри театр нөҥүө бэлэхтии сылдьарыттан ис сүрэхпититтэн үөрэбит.

Надежда Осипова.

«Арчы» хаһыат корреспондена

Анна Захарова хаартыскалара