Ойуунускай уонна Саха театра

Сэтинньи 21 күнүгэр Былатыан Ойуунускай аатынан Саха театрын Олоҥхо саалатыгар театр литератураҕа салаатын “Лекция уонна ретроспектива” диэн бырайыага сүрэхтэннэ. Бу киэһэ ХИФУ уонна АГИКИ устудьуоннара Ойуунускай аатынан Судаарыстыбаннай бириэмийэ лауреаттарын, Ойуунускай туһунан кинигэ ааптардарын, театр теоретиктарын, Саха театрын артыыстарын кытта көрсөн, сэргэхсийэн бардылар.

Бырайыак бастакы тэрээһинэ Ойуунускай төрөөбүтэ 125 сылыгар ананан, “Ойуунускай уонна Саха театра” диэн ааттанан икки түһүмэхтээх киэһэҕэ кубулуйда. Көрсүһүү бастакы аҥарыгар М.К. Аммосов аатынан ХИФУ профессора, филология дуоктара, П.А. Ойуунускай аатынан СӨ Судаарыстыбаннай бириэмийэтин лауреата ВАРВАРА ОКОРОКОВА, суруналыыс, М.К. Аммосов аатынан ХИФУ суруналыыстыбаҕа кафедратын сэбиэдэссэйэ, П.А. Ойуунускай аатынан СӨ Судаарыстыбаннай бириэмийэтин лауреата ОЛЕГ СИДОРОВ, М.К. Аммосов аатынан ХИФУ доцена, филология н.к. ЛЮДМИЛА ГРИГОРЬЕВА кыттыыны ыллылар. Киэһэ иккис аҥарыгар Саха театрын музейын архивыттан “УЛУУ КУДАҤСА” (1989) уонна “ДОЙДУ ОҔОТО ДОРОГУУНАП НЬУКУЛАЙ” (1993), “КЫҺЫЛ ОЙУУН” испиктээкиллэр көрдөрүллүннүлэр. Көрдөрүллүбүт испиктээкиллэри, Ойуунускай театрга суолтатын театр теоретига, философия н.к., П.А. Ойуунускай аатынан СӨ Судаарыстыбаннай бириэмийэтин лауреата ВАЛЕНТИНА ЧУСОВСКАЯ, театровед, искусстоведение кандидата НЬУРГУЙААНА ИЛЛАРИОНОВА ырыттылар.

Саха театрын артыыстара – РФ үтүөлээх артыыһа, СӨ норуодунай артыыһа ЕФИМ СТЕПАНОВ, РФ үтүөлээх артыыһа, СӨ норуодунай артыыһа ГЕРАСИМ ВАСИЛЬЕВ кыттыыны ыллылар. Артыыстар Александра Сивцева, Петр Макаров «Дойду оҕото Дорогуунап Ньукулай» айымньыттан быһа тардыыны сүрдээх истиҥник аахтылар. Театр аатыттан өйдөбүнньүк бэлэхтэри СР Театральнай деятеллэрин сойууһун бэрэсэдээтэлэ, П.А. Ойуунускай аатынан СӨ Судаарыстыбаннай бириэмийэтин лауреата Айаал Аммосов күндү ыалдьыттарбытыгар туттарда