Саха тыйаатыра төрөөбүт тыл уонна сурук-бичик күнүн саҥа бырайыактарынан, суолталаах көрсүһүүлэринэн уонна испэктээктэринэн бэлиэтээтэ.

 

Ол курдук, олунньу 10 күнүгэр, Иммунопрофилактика киинин дириэктэрэ, медицина билимин хандьыдаата, сахалыы Бикипиэдьийэ төрүттээччитин Николай Николаевич Павлов – Халаны кытта «Саха тыла интэриниэт эйгэтигэр” диэн кэпсэтии буолла. Бу кэпсэтиигэ Саха тыйаатырын үлэһиттэрэ, артыыстара кыттыыны ыллылар.

Ону сэргэ бу күннэргэ сахалыы тыыннаах айымньыларынан турбут испэктээктэр турдулар – Платон Ойуунускай “Кэрэкээн ойууна”, “Иирбит Ньукууһа”, “Иммиһит түүлэ”, Алампа “Олох дьэбэрэтэ”, “Таптала”, М.Ефимов “Өлүк таптала” уо.д.а.

Олунньу 13 күнүгэр, Төрүт тыл уонна сурук-бичик күнүгэр, тыйаатыр Лабораторнай саалатыгар “Поэттыын сэһэргэһии” саҥа бырайыак сүрэхтэннэ. Поэзия киэһэтин маҥнайгы ыалдьытынан «Чолбон» сурунаал бас эрээдээктэрэ, поэт Гаврил Андросов – Хабырыыс Ондороос кыттыыны ылла. Артыыстар Хабырыыс Ондороос хоһооннорун аахтылар, салгыы поэты кытта кэпсэтии буолла. Дьон-сэргэ бу бырайыак саха тыла сайдарыгар, бар дьоҥҥо тарҕанарыгар суолталаах бырайыак буоларын бэлиэтээтэ.