Саха тыйаатырын “Поэттыын сэһэргэһии» бырайыага сүрэхтэннэ

 

 

Саха тыйаатырыгар Төрөөбүт тыл уонна сурук-бичик күнүгэр “Поэттыын сэһэргэһии» саҥа бырайыак сүрэхтэннэ. Бырайыак бастакы ыалдьытынан “Чолбон” сурунаал бас эрдээктэрэ, Саха сирин Суруйааччыларын сойууһун бэрэссэдээтэлин солбуйааччы, Арассыыйа Суруйааччыларын сойууһун бырабылыанньатын сэкэрэтээрэ, поэт Гаврил Андросов буолла.

Саҥа бырайыак поэт үлэтин, олоҕу көрүүтүн туһунан санаатын атастаһар сэһэргэһии быһыытынан ааста. Тыйаатыр Лабораторнай саалатыгар поэзияны сэҥээрээччилэр мустан, Ирина Никифорова иилээн-саҕалаан ыыппыт киэһэтигэр, хоһооннору иһиттилэр, ырытыстылар.

”Бүгүн, саха тылын күнүгэр, Баһылай Харысхал туйах хатарааччытын, үөрэнээччитин Гаврил Андросов дьоро киэһэтин оҥорорго сананныбыт, — диэн тыйаатыр сүрүн режиссера Руслан Тараховскай тоһоҕолоон этэр. – Инникитин даҕаны Саха тыйаатыра эдэр поэттары, суруйааччылары кытта үлэтин салҕаан бара туруоҕа, ол курдук пьсеалара туруохтара, хоһоонноро бу саалаҕа ааҕыллыахтара”.

Хабырыыс Ондороос хоһооннорун Саха тыйаатырын бас-көс туттар артыыстара аахтылар: Петр Баснаев, Айаал Аммосов, Дмитрий Татари нов, Иван Попов, Петр Садовников, Иннокентий Луковцев, Роман Дорофеев, Альберт Алексеев, Валентин Макаров.

”Үрдүк сыанаттан көрөр артыыстарбыт хоһооннорбун ааҕаллара, ону бэйэм истэрим, уонна ол тэрээһиҥҥэ кыттарым ураты. Айар куттаах киһи араас хайысханан бэйэтин үлэтин таһаарыахтаах, онон бу сонун формат диэн көрөбүн. Бу бырайыак уутугар-хаарыгар киирэн, билиҥҥи норуокка саха поэзиятын саҥа тыыннаан тиэрдэригэр-тарҕатарыгар баҕарабын”, — диэн поэт Гаврил Андросов бэйэтин сыанабылын биэрдэ.

Бу киэһэ мустубут дьон киһини долгутар, уйулҕатын хамсатар муусукаҕа ууруллубут дириҥ суолталаах хоһооннору истэн астыннылар, дуоһуйдулар.

«Мин урут Гаврил Андросов хоһооннорун ааҕа илик этим. Бу истэн баран наһаа сөхтүм – сиэри-туому, итэҕэли, төрөөбүт дойдутун историятын сүрдээх дириҥник үөрэртэр эбит, ол иһин хоһоонноро олус дириҥ ис хоһоонноохтор эбит. Кини наһаа ыарахан тыллары туттубат эбит, аныгы ыччат оннугу өйдүүр гына суруллубут. Билиҥҥи, төрөөбүт тылын умнан эрэр көлөүнэҕэ олус наадалаах бырайыак дии снаатым”, – диэтэ көрөөччү Ида Дмитриева, идэтинэн төрүт култуура учуутала.

Саргылаана Ильина