Саха тыйаатырыттан Алампа бириэмийэтин лауереатын аатын үс киһи сүктэ

“Алаарар куйаартан күүстээх ситимнээх Алыптаах тыл сүмэтин улуукан талаана Алампалыыр убайыам, ахтарбын көҥүллээ, дуу! Алахчын  Аан  Хотуҥҥар сүгүрүйэ Алкыйа дьиҥ олоҕу туойбутуҥ, Аллаҥҥын, Тааттаҕын, тапталгын хоһуйтуҥ. Аллар атаскар-сахаҥ норуотугар, Алҕаска да таҥнарбакка Алла турар уйгуну баҕартыҥ…” — Бу күннэргэ бука бары Алампанан эрэ олорор курдукпут… Ол иһин ити, “Алампалыыр убайбар!” диэн, сахалыы бастакы судаарыстыбаннай “Манчаары” хаһыат эрэдээктэригэр Анемподист Иванович Софроновка-Алампаҕа анаммыт хоһоонтон быһа тардыынан саҕалаатым. Хоһоон ааптара — “Манчаары”-“Кыым” утумнааччыта “Саха сирэ” хаһыаппыт эрэллээх ааҕааччыта, ааптара Суруйдаана. Алампа бүгүн, сэтинньи 14 күнүгэр, төрөөбүтэ 133 сыла буолла. Бу кэрэ-бэлиэ даатаны көрсө өрөспүүбүлүкэҕэ “АЛАМПА”  уопсастыбаннай бириэмийэ олохтоммутун сырдата сатаатыбыт. Дьэ бүгүн киэһээ бириэмийэни туттарыы  үөрүүлээх тэрээһинэ “Арассыыйа — мин устуоруйам!” мусуойга ыытылынна.

Бырааһынньыктыы киэркэйбит саалаҕа  айар куттаах култуура, искусство диэйэтэллэрэ биир-биир кыайыылаахтары ааттаталаатылар. Ол курдук, Алампа төрүт дойдутуттан Ытык Таатта бэрэстэбиитэллэрэ кэмбиэри аһан,

бастакы – бастыҥ худуоһунньук — “Дархан ойууһут” аат талааннаах худуоһунньук Эдуард Васильевка иҥэриллибитин, дохсун ытыс тыаһын ортотугар биллэрдилэр.

Ити курдук, “Уран тыл” аат лауреатынан тылбаасчыт-суруйааччы Альбина Борисова,

“Идэтигэр бэриниилээх” дьоһуннаах аат лауреатынан литературовед, филологическай наука кандидата, ХИФУ доцена  Валентина Семенова,

“Өрөгөйдөөх өйөөччү” (бастыҥ меценат) аат лауреатынан киинэ продюсера Сардаана Саввина буоллулар.

“Кылаан дьүрүскэн айааччы”  (бастыҥ композитор-мелодист)  аат биллиилээх композитор Владимир Ксенофонтовка,

“Киинэ эйгэтин чыпчаал үлэһитэ” – аатырбыт режиссер Эдуард Новиковка иҥэрилиннэ.

“Бастыҥ артыыс” номинация лауреатынан РФ  үтүөлээх, саха норуодунай  артыыһа, ССРС судаарыстыбаннай бириэмийэтин лауреата Ефим Степанов,

“Бастыҥ артыыска” аат лауреатынан саха норуодунай артыыската Зоя Багынанова,

“Бастыҥ режиссер” аат лауреатынан РФ норуодунай артыыһа, ССРС уонна РФ судаарыстыбаннай бириэмийэтин лауреата Андрей Борисов,

оттон  “Бастыҥ драматург” номинация лауреатынан драматург-суруйааччы Семен Ермолаев-Сиэн Өкөр буоллулар.

Дьоро киэһэни талааннаах дьоммут артыыс Иннокентий Луковцев уонна бэйиэт Яна Байгожаева иилээн-саҕалаан ыыттылар.

«АЛАМПА» бириэмийэни туттарыы сиэригэр-туомугар  сүгүрүйэр артыыстарбыт, суруйааччыларбыт, култуура, ускуустуба диэйэтэллэрэ Анегина Ильина-Дмитриева, Наталья Харлампьева,  Иван Мигалкин, Алексей Павлов, Зоя Попова, Алексей Романов, «Саха» НКИХ генеральнай дириэктэрэ Олег Марков, «Саха сирэ» хаһыат сүрүн эрэдээктэрэ Родион Кривогорницын, айар сойуустар ассоциацияларын чилиэннэрэ, о.д.а. кытыннылар. Дьоро киэһэни тыыннаах муусука  доҕуһуоллаата, Олоҥхо тыйаатырын, Саха тыйаатырын артыыстара, опера, эстрада ырыаһыттара киэргэттилэр. Бу күн, биллэн турар, Алампа хоһоонноро уонна киниэхэ анаммыт айымньылар чуумпутук, чараастык уонна үрдүктүк ааҕылыннылар… СТД Саха сиринээҕи салаатын бэрэссэдээтэлэ, СӨ үтүөлээх артыыһа Айаал Аммосов сөпкө да бэлиэтээтэ — “Тыйаатыр сылыгар АЛАМПА бириэмийэтэ төрүттэммитэ олус улахан суолталаах. Тыйаатыр ускуустуба бары көрүҥнэрин сомоҕолуурун курдук, чуолаан Сомоҕолоһуу сылыгар АЛАМПА биһигини барыбытын сомоҕолоото!”.

Татьяна Маркова, edersaas.ru