Судаарыстыбаннай уонна бэлэтиичэскэй деятель Исидор Бараахап төрөөбүтэ 125 сылыгар ананар Үрүҥ Тунах ыһыах чэрчитинэн, Н. И. Бойлохов аатынан оҕо искусство оскуолатыгар норуот суруйааччыта Миитэрэй Наумов суруйуутугар
“Бүгүн , эбэтэр хаһан да…” диэн Исидор Барахов олоҕуттан хроника-спектаклы көрдүбүт.

Республиканскай тэрийэр хамыыһыйа былаанын быһыытынан Былатыан Ойуунускай аатынан Саха академическай тыйаатырын кэлэктиибэ быйылгы уһулуччулаах биир дойдулаахпыт Исиидэр Бараахап төрөөбүтэ 125 сыллаах үбүлүөйдээх тэрээһиннэригэр быһаччы кыттыыны ылар соруктаахтара.

Бу сыалларын-соруктарын тиһэҕэр тиэрдээри, Тыйаатыр кэлэктиибэ улууспут үбүлүөйдээх ыһыаҕын тэрээһиннэригэр биир быһаччы кыттыыны ылан, улахан күүс-көмө, өйөбүл буола сылдьалларыгар улууспут салалтатын, олохтоохторун аатыттан барҕа махталбытын тиэрдэбит.

Ол курдук, тыйаатыр биир тутаах дьонноро, талааннаах артыыстар Руслан Тараховскай, Илья Стручков биир ый инниттэн кэлэннэр, дьону-сэргэни түмэн, дьүһүйүүгэ туттуллар атрибуттары, декорациялары оҥорон, үбүлүөйдээх ыһыах дьүһүйүүтүн туруоран, дьоҥҥо-сэргэҕэ кэрэ көстүүнү бэлэхтээри айа-тута, үлэлии-хамсыы сылдьаллар. Тыйаатыр артыыстара бүтүн бөлөҕүнэн кэлэн, бэҕэһээ Харбалаахтан саҕалаан, бүгүн улуус ыһыаҕын арыллыытыгар кыттыыны ылан, тэрээһиммитин киэргэтэ сылдьаллар.

Бэҕэһээ Оҕо ускуустуба оскуолатын дьиэтигэр Миитэрэй Наумов пьесатынан турбут Исидор Никифорович Барахов чаҕылхай олоҕор ананар «Бүгүн, эбэтэр хаһан да…» диэн бэлитиичэскэй хроника-испэктээкили көрдөрөн, улуус олохтоохторугар дьоро киэһэни бэлэхтээтилэр.

Айымньылаах үлэлээх Былатыан Ойуунускай аатынан Саха академическай тыйаатырын кэлэктиибигэр барҕа махтал буоллун! Айар аартыккыт арылла турдун!