Былатыан Ойуунускай аатынан Саха академическай театрыгар “Учуутал, эн үрдүк ааккар сүгүрүйэн…” диэн Нуучча театральнай оскуолатын күннэрэ ыытылла тураллар. Бу улахан тэрээһин чэрчитинэн М.С. Щепкин аатынан үрдүкү театральнай училище (институт) преподавателлэрэ, алтыс саха студиятын түөрт сыл артыыс идэтигэр уһуйбут учууталлар кэлэн кыттыыны ыла сылдьаллар.

Бүгүн алтыс көлүөнэ щепкиннэр Жан-Батист Мольер аатырбыт пьесатынан “Дон Жуан или каменный пир” диэн испэктээкилин оонньоон көрдөрдүлэр.

Маалай театр артыыһа, М.С. Щепкин аатынан Үрдүкү театральнай училище (институт) преподавателэ Максим Филатов туруоруорбут испэктээкилин көрдүбүт.

Испэктээкил кэнниттэн СӨ Бырабыыталыстыбатын бэрэссэдээтэлин солбуйааччы Сергей Местников алтыс көлүөнэ саха студиятын бүтэрбит эдэр артыыстары эҕэрдэлээтэ, инникилээх, идэлэригэр бэриниилээх артыыс буолан тахсалларыгар эрэнэрин биллэрдэ. Итиэннэ кинилэри түөрт сыл устата иитэн, талааннарын чочуйан таһаарбыт учууталларыгар Саха театральнай искусствотыгар уонна култууратыгар киллэрсибит кылааттарын иһин Бырабыыталыстыба наҕараадаларын үөрүүлээх быһыыга -майгыга туттарда.

Саха Өрөспүүбүлүкэтин искусствотын үтүөлээх диэйэтэлин аатын Россия народнай артыыскататыгар, алтыс көлүөнэ саха студиятын уус-уран салайааччытыгар Людмила Титоваҕа (Маалай театр), бэһис, алтыс көлүөнэ щепкиннэри бэлэмнээбит профессор Наталья Макароваҕа, Саха Өрөспүүбүлүкэтин Ил Дарханын грамотатын Тамара Лякинаҕа (А.С. Пушкин аатынан Москватааҕы академическай театр), оҕолору салайан илдьэ сылдьыбыт Лена Тимофееваҕа (Саха театра), Саха Өрөспүүбүлүкэтин Бырабыыталыстыбатын грамотатын Анна Гарноваҕа (Моссовет аатынан театр), Саха Өрөспүүбүлүкэтин Бырабыыталыстыбатын махтал суругун Максим Филатовка (Маалай театр) уонна Дарья Аносова-Хорошиловаҕа (В. Маяковскай аатынан театр) туттарда.