Былатыан Ойуунускай аатынан Саха театрыгар бүгүн дьоро күн

Саха Өрөспүүбүлүкэтин үтүөлээх артыыһа, ытык артыыһа Михаил Егорович Семенов 80 сааһын туолбут өрөгөйдөөх үбүлүөйүн Иван Алексеев “Суоһалдьыйа Толбонноох” испэктээкилинэн бэлиэтээтэ.

Петр Макаров, СӨ үтүөлээх артыыһа, Саха театрын дириэктэрэ:
– Бүгүн Саха театрыгар дьоро киэһэ. Ол курдук Саха театрыгар олоҕун анаабыт, аксакалларбытын кытары бииргэ үлэлээбит, урукку театр салгынын илдьэ сылдьар ытык киһибит Михаил Егорович Семенов бүгүн 80 сааһын туолла. Михаил Егорович 1969 сыллаахха Саха театрыгар үлэҕэ киириэҕиттэн күн бүгүнүгэр диэри театрбыт сыанатыгар сүрдээх элбэх оруолу оонньоон, салайааччыларга даҕаны, эдэр көлүөнэ артыыстарга даҕаны тыыннаах холобур буолар. Биһиги, эдэр дьон, киниттэн элбэххэ үөрэммиппит, үөрэнэбит, өссө да үөрэниэхпит!

Руслан Тараховскай, СӨ ускуустубатын үтүөлээх диэйэтэлэ, Саха театрын сүрүн режиссера:
– Бүгүн Саха театрын кэлэктиибигэр ытык күн. Ытык киһибит Михаил Егорович Семенов 80 сааһыгар анаан “Суоһалдьыйа Толбонноох” испэктээкили көрдөрөбүт. Михаил Егорович Аркадий Васильевич Беляев диэн РСФСР народнай артыыһыгар уһуйуллан Новосибирскайдааҕы театральнай училищеҕа үөрэнэн, артыыс идэтин ылбыта. Муора флотугар 3 сыл сулууспалаан баран, Саха театрыгар үлэлии киирбитэ. Ол саҕана Саха театрын салайан олорбут сүрүн режиссер Федот Федотович Потапов. Бастакы улахан оруолларынан Иван Гоголев “Өлүөнэ сарсыардата” испэктээкилгэ – Мохсоҕол, Чингиз Айтматов “Ийэ сирэ” испкэтээкилигэр – Джайнак буолаллар. Онтон Андрей Саввич Борисов туруорууларыгар Ойуунскай Ньоондоор кулуба, “Наара суох” Мотоос кинээс. Билигин биһиги эдэр режиссердарга Сергей Потапов туруоруутугар “Альберти циркэтэ” испэктээкилгэ – Альберти, билигин бара турар “Төлкө” испэктээкилгэ – Дьаакыбылап кулубаны оонньоон, киһи ааҕан сиппэт элбэх оруолларын оонньообута. Кини аан дойду классиката буоллун, саха драматургията буоллун көрөөччүгэ улахан уобарастары айбыт ытык артыыспыт буолар. Михаил Егорович Саха театрыгар мин дууһабар улахан суолу хаалларбыт артыыстартан биирдэстэрэ буолар. Ол курдук Сиэн Өкөр “Куба любовь моя” диэн испэктээкилигэр оонньоон, миигин сүрдээх улаханнык уйадытан турар. “Улахан да артыыс эбит” диэн сөҕө-махтайа көрбүтүм. Кини биһиэхэ барыбытыгар улахан холобур буолар артыыс. “Үрдүк искусствоҕа сулууспалааһын”, “идэҕэ бэриниилээх буолуу”, “театрга сүгүрүйүү” – бу барыта биһиги улахан артыыспытыгар Михаил Егорович Семеновка сыһыаннаах этиилэр. Бүгүн бу үбүлүөйдээх күнүгэр кинини “Суоһалдьыйа Толбонноох” испэктээкилгэ Дьаргыл оруолугар көрүөҕүҥ.

✅ Сергей Потапов, СӨ ускуустубатын үтүөлээх диэйэтэлэ, режиссер:
– Михаил Егорович, эпиттэрин курдук, мин испэктээкиллэрбэр элбэхтик оонньообута. Кини курдук идэтигэр бэриниилээх, театры наһаа таптыыр уонна артыыс идэтигэр бэриниилээх киһини мин өссө көрсө иликпин. Испэктээкилгэ кэлбиккитигэр махтанабын!

✅ СӨ култуураҕа уонна духуобунай сайдыыга миниистирин Юрий Куприянов эҕэрдэ суругун Майя Ермолаева, Дьокуускай куорат баһылыгын Евгений Григорьев эҕэрдэтин уонна бэлэҕин куорат култуураҕа управлениетыттан Анна Каженкина туттардылар.

Михаил Егорович төрөөбүт дойдутуттан Хаҥалас улууһун дьаһалтатын уонна култуураҕа управлениетын аатыттан Ульяна Ноева, Тиит Арыы нэһилиэгин баһылыгын солбуйааччы Софья Андреевна эҕэрдэлээтилэр. Михаил Семенов үөрүүлээх быһыыга-майгыга “Тиит Арыы бочуоттаах олохтооҕо” буолла.

Дириэктэр Петр Макаров театр искусствотыгар сүҥкэн кылаатын иһин А.Н.Жирков аатыттан Ил Түмэн Махтал суругун туттарда уонна Саха театрын кэлэктиибин аатыттан эҕэрдэлээтэ.
СӨ Театральнай диэйэтэллэрин сойууһун бэрэссэдээтэлэ Айаал Аммосов уоттаах-күөстээх эҕэрдэ тылларын анаата.