Монголия биир улахан биллэр Дархан диэн куоратыгар “Кыайыылаахтар параадтара” (“Парад победителей”) диэн моноиспэктээкиллэр Аан дойдутааҕы фестиваллара буолан ааста. Соҕотох артыыс театрын фестивальыгар Монголияттан, Эстонияттан, Мексикаттан, Монте-Негроттан, Испанияттан, Израильтан уонна Саха сириттэн аан дойдуга биллэр үрдүк профессиональнай таһымнаах драма артыыстара кытыннылар. Кыттааччылар толорууларын Нина Мазур бэрэссэдээтэллээх ЮНЕСКО иһинэн Норуоттар икки ардыларынааҕы театральнай искусство институтунан анаммыт биллиилээх театроведтартан турар дьүүллүүр сүбэ сыаналаата.

Бу улахан фестиваль түһүлгэтигэр Саха театрыттан СӨ үтүөлээх артыыската Софья Баранова ситиһиилээхтик кыттан “Бастыҥ артыыска” аатын ылары ситистэ.

“Өрөспүүбүлүкэм былааҕын өрө тутан аан дойду театрдарын түһүлгэтигэр тиийэн төрөөбүт төрүт тылбынан астына оонньоон, дойдум, театрым чиэһин көмүскээбиппинэн – Саха буоларбынан өссө биирдэ киэн тутуннум.  Аан дойдуга биллиилээх артыыстары кытта тэҥҥэ кыттан, чиэстээхтик киирсэн, доҕордоһон кэллим. Тас дойду дьоно биһиги Өрөспүүбүлүкэбитин интэриэһиргииллэрэ, сахалары билэллэрэ истэргэ олус үчүгэй”, – диэн Софья Баранова санааатын үллэһиннэ.

Софья Иннокентьевна “Кыайыылаахтар парааттарыгар” иккис ыҥырыллыыта буолар, бу иннинэ 2018 сыллаахха Улан-Батор куоракка бэйэтин суруйуутугар “Алгыстаах этинии” диэн монодраматын толорбута. Бу сырыыга Чингиз Айтматов “Буурҕалаах тохтобул” (,,Буранный полустанок”) романынан Василий Борисов туруоруутугар ,,Моҥкуруут ийэтэ” моноиспэктээкилинэн кытынна. Чингиз Айтматов бу айымньытын Үлэ Албан Аата уордьан III истиэпэннээх лауреата, СӨ Үтүөлээх учуутала  Трофим Кириллин тылбаастаабыта. Моноиспэктээкил худуоһунньугунан РФ уонна СӨ култууратын үтүөлээх диэйэтэлэ Лена Гоголева үлэлээбитэ.

Санатан эттэххэ, “Моҥкуруут ийэтэ” моноиспэктээкил  Ньурба куоракка «САТА-2023» XII өрөспүүбүлүкэтээҕи театральнай фестивальга кыттан, дьүүллүүр сүбэҕэ үлэлээбит Россия биллиилээх театральнай диэйэтэллэр уонна кириитиктэр Жанна Зарецкая, Глеб Ситковскай уонна Оксана Кушляева биһирэбиллэрин ылбыта, итиэннэ фестиваль “Үһүйээн уонна дьиҥ олох алтыһыытын иһин” диэн анал бирииһинэн наҕараадаламмыта.

2014 с. Өрөспүүбүлүкэтээҕи “Сата” фестивальга Сергей Потапов туруоруутугар “Чудная баба” испэктээкилгэ Дьикти дьахтар оруолун толорбута.

2016 с. Өрөспүүбүлүкэтээҕи “Сата” фестивальга бэйэтин суруйуутугар “Уһуктуу” драманан кыттыбыта, режиссер Сергей Потапов. Испэктээкил “Бастыҥ режиссура”, “Бастыҥ испэктээкил” анал ааттарын ылбыта, ону сэргэ толорооччулар Ирина Никифорова “Бастыҥ дьахтар оруола” анал бирииһин ылбыта, Валентин Макаров – Россия театральнай диэйэтэллэрин сойууһун анал бирииһинэн Москва куоракка барар путевканан наҕараадаламмыта.

“Уһуктуу” испэктээкил 2016 с. Казахстан Астана куоратыгар А.Островскай аатынан Нуучча драмтеатрыгар турбута, СНГ уонна Балтика дойдуларын норуоттар икки ардыларынааҕы бэстибэллэригэр, 2017 с. Татарстан речспубликатын Казань куоратыгар  “Науруз” Түүр тыллаах норуоттар аан дойдутааҕы театральнай фестивальларыгар кыттыбыта.

2018 с. Өрөспүүбүлүкэтээҕи “Сата” фестивальга бэйэтин суруйуутугар “Алгыстаах этинии” монодраманы толорбута, режиссер Александр Титигиров. В 2019 с. бу испэктээкил Монголия Улан-Батор куоратыгар ыытыллыбыт “Парад победителей” диэн Аан дойдутааҕы моноиспэктээкиллэр фестивальларыгар кыттыбыта. 

2020 с. Өрөспүүбүлүкэтээҕи “Сата” фестивальга Роман Дорофеев туруоруутугар “Биэс чаҕыл сулуспут” диэн монодраматынан кыттан “Бастыҥ испэктээкил”, “Бастыҥ дьахтар оруола”анал ааттары ылбыта уонна Россия театральнай диэйэтэллэрин сойууһун анал бирииһинэн Москва куоракка баран “Көмүс мааска” театральнай фестиваль бастыҥ испэктээкиллэрин көрөр путевканан наҕараадаламмыта.

2021 с. Ангелла Поповалыын бииргэ суруйбут “Мария – Кыайыы саллаата” документальнай уус-уран монодрамаларын режиссер Алгыс Макаров Ньурба драмтеатрыгар туруорбута, моноиспэктээкили артыыска Анисья Колесова толорбута. Бу туруоруу “Хаарыан хампа күөх кытылым” театральнай фестивальга уо.д.а. Россия театральнай фестивальларыгар кыттан миэстэслэспитэ.

2022 с. Горно-Алтайскай куоракка “Өбүгэлэртэн бэриллибит төрүт тыын нэһилиэстибэтэ” диэн фестиваль-форумҥа “Психофизика уонна хаанынан бэриллэр удьуор  ситимэ” дакылаатынан кыттыбыта.  Усть-Кааҥҥа ыытыллыбыт “Курултай” диэн түүр олоҥхоһуттарын күөн көрсүһүүлэрин фестивалыгар П.Г. Романов-Мылааныскай “Кыыс Ньургустай Куо” олоҥхотуттан быһа тардыыны, Лена Гримм туруоруутуттан толорон, “Кылыһахтаах ырыа” күрэҕин көрүҥэр  бастакы миэстэни ылбыта.