М.С. Щепкин аатынан Үрдүкү театральнай институт алтыс саха национальнай студиятын бүтэрэн кэлбит эдэр артыыстар билигин өрөспүүбүлүкэбит араас театрдарынан үлэлэрин саҕалаатылар.  Бу күннэргэ алтыс көлүөнэ Щепкиннэр куурсунан бииргэ түмсэннэр, Ньурба улууһун олохтоохторугар икки дипломнай испэктээкиллэрин уонна кылаас-кэнсиэртэрин көрдөрдүлэр. Икки күн Ньурба театрын саҥа уораҕайыгар У.Шекспир “Сайыҥҥы түүҥҥэ түүл”( “Сон в летнюю ночь”) уонна А. Вампилов “Улахан уол”(“Старший сын”) испэктээкиллэрин көрдөрдүлэр. Профориентационнай үлэ хайысхатынан Таркаайы, Маар уонна Ньурбачаан нэһилиэктэригэр оскуола үөрэнээччилэрин кытары көрсөн,  үөрэхтэрин туһунан сырдаттылар, ону сэргэ трениннэри ыыттылар, маастар кылаастары биэрдилэр,  “Улахан уол” испэктээкиллэрин көрдөрдүлэр.

Алтыс студия Щепкиннэри түөрт сыл салайбыт Лена Тимофеева:   

“Ньурба театрыгар алтыс күлүөнэ Щепкиннэртэн Александра Михайлова,  Алена Пономарева,  Евгений Григорьев уонна Ефрем Татаринов үлэлэрин саҕалаатылар. Ньурбатааҕы судаарыстыбаннай драматическай театр уус-уран салайааччыта Юрий Макаров ыҥырыытынан бары бииргэ түмсэммит Ньурба улууһугар гастролга сырыттыбыт. Миэхэ тус бэйэбэр, Ньурбачаан нэһилиэгэр сылдьыбыппыт ордук долгутуулаах, тоҕо диэтэр Саха театрыгар уһун сылларга литературнай чаас сэбиэдиссэйинэн үлэлээбит драматург, суруйааччы Иннокентий Аквсентьевич Дмитриев-Сиэн Чолбодук төрөөбүт дойдута. Кини миэхэ чугас киһим этэ, таптааммын эһээ диэн ааттыырым . Кини дойдутугар аан маҥнай үктэнним. Иннокентий Аквсентьевич Щекпин оскуолатын кытары ыкса ситимнээх киһи, ол курдук Щепкин училищетын төрдүс саха студиятын оҕолоругар куратор этэ. Онон кини төрөөбүт дойдутугар алтыс саха студиятын оҕолоро испэктээкиллэрин көрдөрөллөрө бэйэтэ туспа бэлиэ түгэн. Ньурба театрын салалтата уонна кэлэктиибэ олус сылаастык көрүстүлэр. Театр труппата бу күннэргэ гастролга сылдьар буолан, аҕа саастаах көлүөнэ артыыстары кытары көрүстүбүт. Ньурба куората кэнники сылларга олус тупсубут диэн бэлиэтээтим. Оҕолор испэктээкиллэрин бары түмсэн толору састаабынан көрдөрбүттэриттэн олус дуоһуйдулар, эдэр эрдэхпитинэ, сыл аайы маннык бииргэ оонньуурбут буоллар диэн баҕа санааларын эттилэр.

Испэктээкиллэр кэннилэриттэн санаа атастаһыылара, ырытыһыылар буоллулар”, – диэн алтыс көлүөнэ Щепкиннэр бастакы гастролларын туһунан санаатын үллэһиннэ.