Саха театрыгар биллэр судаарыстыбаннай уонна общественнай диэйэтэл, СӨ норуодунай суруйааччыта, биллиилээх драматург, Дмитрий Наумов 75 сааһыгар аналлаах испэктээкиллэри түмүктүүр киэһэ буолла.
Үөрүүлээх быһыыга-майгыга Саха театрын дириэктэрэ Петр Макаров уонна сүрүн режиссер Руслан Тараховскай көрөөччүлэр иннилэригэр сыанаҕа тахсан Дмитрий Федосеевиһы эҕэрдэлээтилэр.
“Ытыктыыр чугас киһибит Дмитрий Федосеевич олоҕун барытын саха норуотугар анаабыт киһи. Кини салайар үлэҕэ сылдьан олохпут-дьаһахпыт тупсарын, тыа сирин олохтоохторо сайдалларын туһугар үлэлээбитэ. Билигин бочуоттаах сынньалаҥыгар олорон дьон сэргэ биһирэбилин ылар пьесалары, кэпсээннэри суруйан култуура уонна искусство сайдарыгар тус кылаатын киллэрэр. Бүгүҥҥү дьоро күҥҥэ Саха театрын бар дьоно бука бары биһиги ытык киһибитин Дмитрий Федосеевич Наумовы эҕэрдэлиибит!” – диэн туран дириэктэр Петр Макаров Саха театрын аатыттан өйдөбүнньүк бэлэх туттарда.
“Саха бастыҥ драматура” диэн Алампа аатынан бириэмийэ лауреата буолбуппар Сахам театрыгар махталым улахан. Бу сыанаҕа турбут испэктээкиллэрим иһин бу үрдүк ааты ыллым, дии саныыбын. Саха театрын кэлэктиибигэр махтанабын,” – диэн Дмитрий Федосеевич махталын биллэрдэ, итиэннэ “Сандаарар сарыал саллааттара” испэктээкил суруллубут историятын көрөөччүгэ иһитиннэрдэ.
Сүрүн режиссер Руслан Тараховскай: “Дмитрий Федосеевиһы көрүстэхпинэ төрөөбүт дойдубун Үөһээ Бүлүү улууһун Нам сэлиэнньэтин санаан кэлэбин. Дмитрий Федосеевич хас да айымньытын туруорбут, испэктээкилигэр оонньообут дьоллоохпун. Ол курдук “Оҕустар забастовкалара” диэн кэмиэдийэтигэр артыыс быһыытынан оонньообутум, онтон режиссер быһыытынан уонча сыллааҕыта “Бүгүн, эбэтэр хаһан да…” диэн айымньытын Андрей Саввич Борисовтыын, онтон кэнники “Республика“ уонна “Сандаарар сарыал саллааттара” диэн испэктээкиллэри туруорбутум. Дмитрий Федосеевич саҥа пьесаларыҥ Саха театрын сыанатыгар өссө да туруохтарын баҕарабын!” – диэн айымньылаах үлэни баҕарда.
Ытыктабыллаах Дмитрий Федосеевич!
Хатыламмат талааныҥ
Хаттыгастана турдун,
Көхсүҥ кэҥээтин, санааҥ уһаатын!
Эппитиҥ экчи буоллун,
Суруйбутуҥ чахчы буоллун!
Умсулҕаннаах уйулҕалаах
Айар олоҕу олор!
