Бүгүн сэтинньи 11 күнэ бүтүн саха норуотугар үөрүүлээх күн – Саха автономиятын төрүттээччилэртэн биирдэстэрэ, республика бастакы салайааччыта, ССРС Үрдүкү Сэбиэтин бастакы ыҥырыылаах мунньаҕын депутата, Саха АССР үрдүкү Сэбиэтин бастакы бэрэссэдээтэлэ, Саха сэбиэскэй уус-уран литературатын төрүттээбит суруйааччы, уһулуччулаах политическай диэйэтэл, лингвист-учуонай, наука салайааччыта, улуу убайбыт Платон Алексеевич Ойуунускай төрөөбүтэ 130 сыла.

Бу күннэргэ өрөспүүбүлүкэ үрдүнэн араас хабааннаах үбүлүөйдээх тэрээһиннэр үөрүүлээх быһыыга-майгыга ыытылыннылар. Бүгүн Саха театрын салалтата, артыыстара Былатыан Ойуунускай пааматынньыгар үгэс буолбут сибэкки ууруутугар кытыннылар, Саха духуобунай лидэрэ күн сирин көрбүт күнүгэр Былатыан Ойуунускайга сүгүрүйүү пааматынньыга турар Орджоникидзе болуоссатыгар ыытылынна.

СӨ Ил Түмэн судаарыстыбаннай мунньаҕын бэрэссэдээтэлэ Алексей Еремеев эҕэрдэ тылынан саҕаланна, Саха Өрөспүүбүлүкэтин салалтата Былатыан Ойуунускай аатын үйэтитиигэ ыытар үлэлэрин иһитиннэрдэ, итиэннэ саха норуотун чулуу уолаттара өрөспүүбүлүкэбит сайдыытыгар түһэрбит акылааттарыгар олоҕуран күүскэ үлэлиэххэйиҥ диэн ыҥырда.

Таатта улууһун баһылыга Айаал Бурцев эҕэрдэ тылын эттэ.

СӨ үтүөлээх бырааһа, суруйааччы Егор Борисов “Оҕо куйуурдуу турара” фонда аатыттан Чөркөөхтөн сылдьар ситиһиилээх устудьуоннарга Былатыан Ойуунускай аатынан стипендияны “Улуу убайбыт кута-сүрэ билигин да тыыннаах, Былатыан Ойуунускай аатыттан кэнчээри ыччаппыт өйдөөх, үлэһит, кыайыгас-хотугас буолуҥ” диэн алҕаан туран туттартаата. Стипендиат буолбут устудьуоннар улуу суруйааччы хоһооннорун аахтылар.

Былатыан Ойуунускай сырдык аатыгар сүгүрүйүү үөрүүлээх чааһа пааматынньыгар уопсастыбаннас сибэкки ууруутунан уонна Тупсуу оһуохайынан түмүктэннэ.