Бүгүн, сэтинньи 14 күнүгэр, саха уус-уран литературатын төрүттээччилэриттэн биирдэстэрэ, саха искусствотын түөрэҕин түһэрсибит, Саха театрын төрүттээччи, сүдү суруйааччы, саха норуотун духуобунай лиидэрэ А.И.Софронов-Алампа күн сирин көрбүт күнүгэр үгэс буолбут Алампа аатынан норуот бириэмийэтин туттарыы Былатыан Ойуунскай аатынан Саха театрыгар бэһис төгүлүн ыытылынна.
Биһиги театрбыт режиссердара, артыыстара сыл ахсын бу бириэмийэни тэрийэр үлэҕэ кытталлар, анал аакка киирсэн кыайыылаах аатын сүгэллэрэ үөрдэр.

Быйылгы үбүлүөйдээх бэһис Алампа бириэмийэтин туттарыы сиэрин-туомун эдэр режиссер Роман Дорофеев туруорда. Саха театрын эдэр артыыстара Алампа хоһооннорун аахтылар, ырыаларын ыллаатылар, испэктээкиллэртэн быһа тардыылары көрдөрдүлэр.
Бииргэ үлэлиир үөлээннээхтэрбит СӨ искусствотын үтүөлээх диэйэтэлэ, биллиилээх режиссер Сергей Потапов “Дэгиттэр режиссер” анал аат кыайыылааҕынан таҕыста.

Россия судаарыстыбаннай бириэмийэтин лауреата, СӨ үтүөлээх артыыһа Иннокентий Луковцев “Бастыҥ артыыс” анал ааты ылла.
Бииргэ үлэлиир үөлээннээхтэрбит дьоһун ситиһиилэринэн үөрэн, долгуйан туран истиҥник эҕэрдэлиибит!

Өссө даҕаны айар-тутар үлэҕит аартыктара арыллан, ситиһии үрдүк дабайыыларыгар сирдии туруохтун!