Оҕо библиотекатыгар артыыстардыын көрсүһүү

Олунньу 14 күнүгэр «Төрөөбүт төрүт тылым» өрөспүүбүлүкэтээҕи бэстибээл чэрчитинэн Былатыан Ойуунускай аатынан Саха академическай театр артыыстара Елена Маркова уонна Жанна Ксенофонтова-Федорова Оҕо арыллар, ааҕар киинигэр кэлэн ыалдьыттаатылар. Көрсүһүүгэ Дьокуускай куорат саха национальнай гимназиятын 8 кылааһын оҕолоро кытыннылар.

Артыыстар бэйэлэрин үлэлэрин туһунан, хайдах Саха театрыгар аан бастаан кэлбиттэрин кэлбиттэрин, артыыс үлэтин таптыылларын, оруолга хайдах киирэллэрин туһунан бэрт сэргэхтик кэпсээтилэр. Оҕолор сахалыы киинэни, театр спектакылларын сөбүлүүллэрин, сылдьалларын туһунан эттилэр, элбэх ыйытыылары биэрдилэр. Артыыс идэтигэр ханна туттарсыахха сөбүн ыйыталастылар. Артыыс буолар төһө ыараханын, уһун тиэкистэри хайдах өйгө тута сылдьар ньымалары, хайдах гынан дорҕооннохтук саҥарары интэриэһиргээтилэр.

Ыалдьыттарбыт дорҕоонноохтук сөпкө саҥарарга эрчиллиилэри көрдөрдүлэр. Манна сөпкө тыыныы, тылбыт, сирэйбит, айахпыт былчыҥнарын хамсатыы, долгуйууну аһардарга холкутуйуу сүрүн оруоллаахтар эбит.

Елена Маркова оруолга киирэргэ төһө да ыарахан герой, сюжет буоллар үлэҕин таптыыр эбит буоллаххына ол барыта кыалларын бэлиэтээтэ.
Жанна Ксенофонтова-Федорова туохтан да чаҕыйбат буола үөрэниҥ, туттарсар буоллаххытына сатыыргытын барытын оҥорон, көрдөрөн иһиҥ диэн сүбэлээтэ.
Артыыстарбыт оҕо библиотекатыгар сылдьан, көрсөн-билсэн оҕо сааспытыгар төннүбүт курдук сананныбыт, олус үчүгэй тэрээһин буолла диэн астыннылар.

ДТК – центр чтения Национальной Бибилиотеки РС (Я).