Өлөөн олохтоохторугар сэргэх күннэр үүннүлэр — Былатыан Ойуунускай аатынан Саха тыйаатырын артыыстара кэллилэр!

Болдьоммут күн «Илкээнньи» сынньалаҥ киинигэр ыалдьыттары эбэҥкилии эҕэрдэлээх, Аал уоту оттон көрсүһүү сиэрин-туому толорууттан саҕаланна. Эҕэрдэ ырыатынан ыалдьыттары элбэх ырыа ааптара Тимур Корякин айхалаата. Күн эргииринэн төгүрүччү эргийэ сиэттиһэн эбэҥкилии дьуохар ырыата дьиэрэйдэ, дьол-үөрүү түһүлгэтэ түстэннэ. Биһиги улууспутугар маннык тыйаатыр бөлөҕө кэлэн барбыта син быданнаата. Ол төрүөтүн биллэр биричиинэтэ — ковид.

Бу сырыыга артыыстар Николай Неустроев «Тиэтэйбит», Дмитрий Таас «Кыһыл көмүс хоруоп» айымньыларынан туруоруллубут испиэктээхтэри оонньообуттарын көрөөччүлэр дохсун ытыс тыаһынан ылыннылар.

Уон биэс киһилээх артыыстар биригээдэлэрэ Үрэн хоһуун дойдутугар айылҕаттан анаммыт талааннарын арыйан, табыллан ситиһиилээхтик айа-тута сылдьаллара көрөөччүлэргэ үөрүүнү аҕалла.

Ол курдук, кинилэр ортолоругар көрөөччү кутун туппут, норуокка биллэр артыыстар: Саха Өрөспүүбүлүкэтин үтүөлээх артыыстара Домна Уйгурова, Елизавета Потапова, Софья Баранова, Дмитрий Михайлов, Дьулустаан Семенов, Геннадий Турантаев, Михаил Апросимов, Ильяна Павлова, ону тэҥэ Роман Дорофеев, Александр Борисов, Ньургун Никитин, Николай Протасов, Сандаара Федотова, Юлия Санникова, уот-күөс, тыас-уус оператора Александр Решетников кэлэннэр, кэрэ-бэлиэ киэһэлэри бэлэхтээтилэр.

Үүнэн иһэр, эдэр кэскиллээх артыыстар бастакы сүрэхтэниилэрин аастылар, сотору кэминэн кинилэр ситэри чочуллан, өссө да үрдүк таһаарыылаахтык үлэлээн-хамсаан, үүнэн-сайдан көрөөччүнү сөхтөрөр уобарастары айыахтара турдаҕа.

Маннык сэргэх кэһиилээх артыыстарбыт инникитин да кэлэ туруохтара диэн эрэнэбит. Ыраах диэбэккэ Аартыка олохтоохторун кытыры алтыһан ааспыттарыгар барҕа махталбытын тиэрдэбит. Ситиһиилээх, айымньылаах үлэни, хотоҕостуу субуллар көрөөччүлэри баҕарабыт.