Илья Стручков салайааччылаах Саха театрын артыыстара Таатта улууһугар Карел Чапек “Ийэ” уонна Былатыан Ойуунускай айымньыларынан “Оҕоҕо баҕарбыт” испэктээкиллэринэн гастроллуу сылдьаллар. Быйылгы гастрол Былатыан Ойуунускай төрөөбүтэ 130 сылыгар, дойдубутугар – Дьиэ кэргэн, өрөспүүбүлүкэҕэ – Оҕо саас, Таатта улууһугар – Эрэл, Таптал, Итэҕэл сылыгар ананар.
Саха театрын артыыстара гастрол кэмигэр олохтоох нэһилиэнньэни кытары көрсүһүүлэри тэрийэн, маастар-кылаастары көрдөрөн, ыччаты театры кытары билсиһиннэрэр үлэлэри ыыталлар. Оскуола үөрэнээччилэрэ гримнэнэн, көстүүм кэтэн араас уобарастарга холоннулар, сүрдээҕин астыннылар. Кыйы нэһилиэгин оҕо уһуйааныгар анаан СӨ норуодунай артыыската Зоя Багынанова кырачааннары кытары көрүстэ.
Бу күннэргэ Тыараһа нэһилиэгэр төрөөбүт тылга аналлаах “Тыыннаах тыл” диэн алтыс төгүлүн ыытыллар дириҥ ис хоһоонноох өрөспүүбүлүкэ таһымнаах тэрээһин ыытылынна. Уус-уран ааҕыы күрэҕигэр Саха театрын артыыстара көхтөөхтүк кытыннылар, ол курдук Таатта улууһуттан төрүттээх Матрена Христофорова Алампа хоһоонун уус-ураннык ааҕан күрэҕи саҕалаата, эдэр артыыска Нарыйа Колесова Алампа “Таптал” драматыттан Кэтириис монологун ааҕан баран ыллаан көрөөччүнү долгутта, Илья Стручков “Тулаайах оҕо” испэктээкилтэн быһа тардан чуһуурбаҕа оонньоото.
Илья Стручков, Саха театрын артыыһа, гастрольнай биригээдэ салайааччыта:
- Карел Чапек “Ийэ” уонна Былатыан Ойуунускай “Оҕоҕо баҕарбыт” испэктээкиллэри көрөөччү олус сэргээн сэҥээрэн көрдө, олус истиҥник ылынна.
Бу гастролу айаммытыгар Улуу убайбыт Былатыан Алексеевич Ойуунускай төрөөбүт алааһыгар үс буолан тахса сылдьыбыппыт. Ытык киһибит Зоя Петровна Багынанова буһарбыт алаадьытынан сир-дойду иччитин айах тутан сиэри-туому толорон көҥүл ылан, көрдөһөн. Айаммытын салгыыбыт. Гастроллар этэҥҥэ баран иһэллэр. “Тыыннаах тыл” ааҕыы күрэһигэр илин эҥэр улуустарын оҕолоро уонна хотугу улуустар видеоматырыйаалынан кыттыыны ыллылар. Театрбыт дириэктэрэ Петр Макаров бу иннинэ хаста да кэлэн көхтөөх кыттыыны ылбыт. Кыйы сэлиэнньэтин олохтоохторо айар куттаах, патриот дьон буолан, сиэр-майгы өттүгэр уопсастыбаннай хамсааһыҥҥа оҕолору, ыччаты түмэн үлэлии-хамсыы сылдьаллар эбит, – диэн санаатын үллэһиннэ.
