“Үөһээ Бүлүүгэ – Саха театрын күннэрэ” саҕаланнылар

“Үөһээ Бүлүүгэ – Саха театрын күннэрэ” Үөһээ Бүлүүлэр биир дойдулаахтара Николай Якутскай дьон-сэргэ киэҥ биһирэбилин ылбыт «Төлкө» айымньытынан саҕаланна 👏🏼👏🏼👏🏼

Испэктээкил иннинэ Саха театрын бары дьонун аатыттан театр дириэктэрэ Петр Тимофеевич гастролу өйөөн, артыыстары сахалыы сиэринэн маанылаан-далбардаан көрсүбүттэригэр махтанан туран, Үөһээ Бүлүү улууһун дьаһалтатыгар уонна Үөһээ Бүлүү улууһун Култуураҕа уонна духуобунай сайдыыга департаменыгар өйдөбүнньүк бэлэхтэри туттартаата!

Үөһээ Бүлүүгэ Саха театрын күннэрин иккис күнүгэр үгэс быһыытынан көрөөччүлэри кытары көрсүһүүлэр саҕаланнылар

Бүгүн ССРС норуодунай учуутала, ССРС норуотун үөрэҕириитин туйгуна, Саха АССР уонна РСФСР оскуолаларын үтүөлээх учуутала Михаил Андреевич Алексеев аатынан Республиканскай лицей-интернат үөрэнээччилэрин уонна учууталларын кытары Саха театрын артыыстара Елена Маркова, Нюргуяна Шадрина, Роман Дорофеев Айсен Лугинов, Вячеслав Лавернов көрүстүлэр.

Саха театр эйгэтин оҕолорго сырдаттылар, талан ылбыт идэлэрин, үлэлэрин туһунан кэпсээтилэр. 🤩Кэпсэтиигэ тоҕуоруһа мустубут оҕолор көхтөөхтүк кытыннылар, ордук артыыс идэтин туһунан, хайдах ньымалары туһанан көрөөччүгэ тиийэр гына оонньуохха сөбүн ыйыттылар.

Артыыстар ыйытыыларга эппиэттээтилэр, театр эйгэтин кытары инникитин олохторун ситимниэн баҕалаах оҕолорго кинигэни элбэхтик ааҕарга сүбэлээтилэр. Бүгүҥҥү көрсүһүүттэн Саха театрын артыыстара даҕаны, лицей оҕолоро даҕаны олус астыннылар, чахчы истиҥ сэһэргэһии буолла.