.Ойуунускай аатынан Саха театрыгар бэс ыйын 10-11 күннэригэр дьиҥнээх суут дьыалатыгар олоҕурбут «Таптал сүппүт куората» диэн испэктээги сүрэхтиэхтэрэ. Саҥа саҕалааччы режиссер Василий Борисов бу театр улахан сыанатыгар бастакы туруоруута. Бу испэктээгинэн «Театрга аныгы драматургия» диэн бырайыагы саҕалыахтара. Бу туһунан бэс ыйын 7 күнүгэр премьераҕа анаммыт пресс-конференцияҕа иһитиннэрдилэр.
Саҥа туруорууга кэтиллэр көстүүмнэри Сардаана Федотова тобулла, Николай Павлов музыканан, Леонид Мотхонов уотунан киэргэттилэр. Сценографияҕа сюрреалист-худуоһунньук Рене Магритт хартыыналарын туһаннылар. Сүрүн оруолларга народнай артыыска Степанида Борисова, үтүөлээх артыыс Петр Баснаев, Матрена Горохова, Айаал Аммосов, Матрена Седельникова, Елена Маркова, Жанна Ксенофонтова уо. д. а. оонньуохтара. Ону тэҥэ маассабай сыанаҕа Арктикатааҕы култуура уонна искусство институтун үһүс куурсун устудьуоннара кыттыахтара.
Испэктээк судьуйа Александр Седалищев дьиҥнээх суут дьыалатыттан суруйбут пьесатынан Мария Докторова тылбааһыгар турда. Айымньыга аһыныгас буолуу, кырдьык иһин охсуһуу, эдэр киһи олох охсуутун, суут-сокуон кытаанах хараҕын, улахан дьон хаҕыс сыһыанын уйуута, арыгы алдьархайа курдук кыһалҕа көстүө.
Александр Седалищев 20 сыл ыстаастаах судьуйа. Нерюнгри куорат суутугар уонча сыл үлэлээбит, салгыы эмиэ уон сыл устата Саха Өрөспүүбүлүкэтин Үрдүкү суутун бэрэссэдээтэлин солбуйбут, бэрэссэдээтэл эбээһинэһин толорбут. Суруйуунан дьарыктаммыта өр буолбут. Үс сылтан бэттэх бэчээттэнэр. Саха театрын сыанатыгар сүрэхтэниэхтээх пьесатын уһун кэм устата толкуйдаан, суруйан, быйыл кыһын түмүктээбит.
Александр Седалищев, пьеса ааптара
«Андрей Борисов суукка сыһыаннаах тиэмэни көрдүү сылдьара. Ол кэмҥэ мин бу пьесабын аахтарбытым. Суруйуубар араас дьон уобараһын, түбэлтэни түмтүм диэххэ сөп. Куһаҕана суох пьеса таҕыста дии саныыбын. Режиссер Василий Борисовы кытта ыкса үлэлээн, премьерабыт буолаары турар. Онон олус долгуйабын, үөрэбин, киэн туттабын. Маннык таһымҥа тахсыбыппын, кырдьыгынан эттэххэ, бэйэм да итэҕэйбэппин. Баҕар бу пьесаны атын региоҥҥа эмиэ туруоруохтара, кэпсэтии бара турар», — диэн пьеса ааптара Александр Седалищев санаатын үллэһиннэ.
Театр уус-уран салайааччыта Андрей Борисов этэринэн, быйылгы сезонтан «Театрга аныгы драматургия» диэн бырайыак үлэтин саҕалыыр. Бу бырайыак иитинэн, Саха театрыгар аныгы драматурдар айымньыларын туруоруохтара. Бу премьера кэннэ от ыйыгар аатырбыт тренер Дмитрий Коркин туһунан драматург Утум Захаров пьесатынан режиссер Сергей Потапов испэктээгэ сүрэхтэниэ.
«Театрбытыгар араас хаттыгастаах бырайыактары киллэрэн эрэбит. Аныгы ааптардары кытта кэпсэппиппит икки сыл буолла. Онтон дьэ Андрей Борисов саҕалааһынынан, быйылгы сезоҥҥа икки испэктээги бэлэмнээтибит. Коркин туһунан туруорууга СӨ физическэй култуураҕа уонна спортка министерствота кыттыста. Бары өттүнэн өйөбүл буоллулар. Премьерабыт от ыйын 14, 15, 16 күннэригэр буолуоҕа. Биһиэхэ аныгы драматургия бырайыага олус туһалаах. Режиссердар да артыыстар да үлэлииргэ бэлэмнэр. Кэлэр сезоҥҥа бырайыагы сайыннарар, салгыыр былааннаахпыт», — диэн театр дириэктэрэ Петр Макаров кэпсээтэ.
Саха театра быйылгы 117-с сезонун түмүктүүрэ чугаһаата. Бэс ыйын бүтүүтэ Щепкин аатынан театральнай институту бүтэрбит алтыс көлүөнэ саха артыыстара Дьокуускайга кэлэн, дипломнай үлэлэрин көрдөрүөхтэрэ. Ол кэннэ быйылгы сезон саҥа туруорууларын өссө төгүл көрөөччүгэ бэлэхтиэхтэрэ. Салгыы Дмитрий Коркин туһунан испэктээк премьератынан сезону түмүктүөхтэрэ.
Елизавета Васильева
