Саха театрыгар от ыйын 14,15,16 күннэригэр премьера

Анонс

Саха өрөспүүбүлүкэтигэр физкультурнай хамсааһын 100-сылыгар уонна саха норуотун көҥүл тустууга уһулуччулаах тириэнэрэ Дмитрий Коркин төрөөбүтэ 95 сылыгар анаан Былатыан Ойуунускай аатынан Саха театра от ыйын 14,15,16 күннэригэр Саха сирин олохтоохторугар уонна ыалдьыттарыгар спортка, олоххо уонна Төрөөбүт дойдуга ураты тыыннаах таптал туһунан испэктээкили бэлэхтиир. «Коркин. Андаҕар” испэктээкил эдэр драматург Утум Захаров пьесатынан Саха Өрөспүүбүлүкэтин физическэй култуураҕа уонна спортка министиэристибэтин сакааһынан туруоруллунна. Испэктээкил саха норуотугар көҥүл тустууну бэлэхтээбит, Саха АССР үтүөлээх учуутала, САССР, РСФСР уонна СССР үтүөлээх тириэнэрэ, “Бочуот знага”, “Өктөөп Өрөбөлүүссүйэтэ” орденнар кавалердара Дмитрий Петрович Коркин олоҕун, айымньылаах үлэтин туһунан кэрэхсэбиллээхтик кэпсиир.

Сэбиэскэй Сойууска көҥүл тустуу оскуолатын аан бастакынан тэрийбит энтузиаст, саха ыччатын сайдыытыгар саҥа суолу тэлбит талааннаах тириэнэр Дмитрий Петрович Коркин: «Дьол-көҥүл, норуот иһин күүс кыайарынан, сүрэх баҕатынан үлэлииргэ бэлэммин”, – диэн эппит андаҕара бу уустук кэмҥэ сирдьит сулус буолан көрөөччү сүрэҕэр тиийиэхтин.