Сэтинньи 19 күнүгэр театрбытыгар Россия үтүөлээх, Саха Өрөспүүбүлүкэтин норуодунай артыыската Елена Румянцева-Сергеева үбүлүөйүгэр анаан “Охсор чаһыы дуораана” испэктээкил премьератын иккис күнэ буолла!

Дохсун ытыс тыаһын доҕуһуолугар ааспыт испэктээкил кэнниттэн СӨ култуураҕа уонна духуобунай сайдыыга миниистирэ Афанасий Ноев үбүлүөйдээх артыыскаҕа Елена Сергеева-Румянцеваҕа министиэристибэ аатыттан иһирэх эҕэрдэтин эттэ, итиэннэ Ил Дархан Айсен Николаев эҕэрдэ суругун үөрүүлээх быһыыга-майгыга  туттарда.

Уус-уран салайааччыбыт Андрей Борисов бүгүҥҥү дьоро күнүнэн истиҥник эҕэрдэлээн туран, бииргэ үлэлээбиттэрин тухары Елена Диасовнаны үлэһит, чаҕылхай талааннаах, театрга уонна искусствоҕа бэриниилээх артыыска быһыытынан бэлиэтээтэ.

Саха театрын бар дьонун аатыттан дириэктэрбит Петр Макаров, Театр диэйэтэллэрин сойууһун аатыттан бэрээссэдээтэл Айаал Аммосов истиҥ тыллардаах эҕэрдэлэрин эттилэр. Елена Сергеева-Румянцева көлүөнэ көрөөччүлэргэ, Саха театрын араас көлүөнэ салалтатыгар, оруоллары итэҕэйбит режиссердарыгар, бииргэ үлэлиир үлээннээхтэригэр махталын биллэрдэ.