Балаҕан ыйын 25 күнүгэр СӨ бырабыыталыстыбатын дьиэтин овальнай саалатыгар Арассыыйа уонна Саха сирин судаарыстыбаннай наҕараадаларын туттарыы үөрүүлээх сиэрэ-туома буолла.

Үрдүк наҕарааданы туттарыы үөрүүлээх чааһыгар Ил Дархан Айсен Николаев «Саха Өрөспүүбүлүкэтин норуодунай артыыһа» бочуоттаах ааты Саха театрын артыыһыгар Михаил Егорович Семеновка туттарда. Үрдүк аат Михаил Егорович өрөспүүбүлүкэ култуурата уонна ускуустубата сайдарыгар тус кылаатын уонна өр сыллаах айар үлэтин иһин Ил Дархан 2023 сыл балаҕан ыйын 21 күнүнээҕи 2979 нүөмэрдээх Ыйааҕынан иҥэриллибитэ.

Михаил Егорович 1969 с Новосибирскайдааҕы театральнай училищены бүтэрэн, драма артыыһын идэтин ылыаҕыттан Былатыан Ойуунускай аатынан Саха театрыгар 55 сыл устата таһаарыылаахтык үлэлиир. Үйэ аҥарыттан ордук кэм тухары театр сыанатыгар умнуллубат уобарастары арыйан, араас хабааннаах оруоллары көрөөччү дохсун ытыһын тыаһын доҕуһуолугар оонньуур. Хаһыс да көлүөнэ эдэр артыыстарга мэлдьи тыынаах холобур буолар.