Алтынньы 17 күнэ Саха театрын төрүттэммит күнэ

Бу күн 1925 сыллаахха Саха уус-уран литературатын төрүттэспит суруйааччы, драматург Николай Неустроев “Куһаҕан тыын” кэмиэдийэтэ оонньоммута, Саха драматическай театра арыллыбыта.

Театрбыт төрүттэммит күнүн Аар саарга аатырбыт “Хаарыан хампа күөх кытылым…” испэктээкилинэн саҕалаатыбыт.

Испэктээкил иннинэ Саха театрын дириэктэрэ Петр Макаров тахсан бука бары көрөөччүлэри театр төрүттэммит күнүнэн эҕэрдэлээтэ, итиэннэ Былатыан Ойуунускай аатынан Саха театрын Хабаровскай куоракка ыытыллыбыт Уһук Илин театрдарын фестивалыгар кыттыытын, Улан-Удэ куоракка “Улахан гастролларга” сырыытын кылгастык иһитиннэрдэ. Саха театрын сүрүн режиссера Руслан Тараховскай М.С. Щепкин аатынан Үрдүкү театральнай училище алтыс саха студиятын бүтэрэн кэлбит эдэр артыыстары көрөөччүлэргэ билиһиннэрдэ, театр уонна көрөөччүлэр ааттарыттан оҕолорго «Айар аартыккыт аһаҕас буоллун, айанныыр суолгут алгыстаах буоллун» —диэн алгыс тылларын эттэ