Алтынньы ыйын 29 күнүгэр, Опера уонна балет театрын улахан уораҕайыгар, Саха Өрөспүүбүлүкэтин үтүөлээх артыыһа, Алексей Елисеевич Кулаковскай аатынан Судаарыстыбаннай бириэмийэ лауреата, ийэ, эбээ уонна хос эбээ Зоя Гаврильевна Попова өрөгөйдөөх 75 сааһын бэлиэтиир дьоро киэһэтинэн Олоҥхо тыйаатыра 16-с айымньылаах дьылын арыйдыбыт.
“Идэм уонна Тапталым –
Дьиҥ көмүс тайаҕым!
Таҥнарбат, охторбот тирэҕим.
Охсууттан охтубат бэйэлээҥ,
Олохпун үрдүккэ кынаттааҥ,
Кэнчээрим кэскилин арчылааҥ!” диэн
Зоя Гаврильевна Попова бэйэтин тылларынан дьоро киэһэбит үөрүүлээх түһүмэҕин саҕалаабыппыт.
Зоя Гаврильевна оҕо сааһыттан артыыс буолар ыра санаатын толорон, 1974 сыллаахха М. С. Щепкин аатынан Үрдүкү Москватааҕы театральнай училище саха студиятын драма театрын уонна киинэ артыыһын идэтигэр үөрэнэр. Кэргэнэ Фадей Поповтуун Ньурба көс тыйаатырыгар айымньылаахтык үлэлииллэр.
1993 сыллаахха Зоя Гаврильевна Ньурбаҕа оройуоннааҕы култуура дьиэтигэр үлэлиир. Ол кэмҥэ өрөспүүбүлүкэҕэ бастакынан “Олоҥхо” народнай тыйаатырын тэрийэр.
Ааспыт үйэ 90 сылларыгар Ньурба улууһугар сахалыы тыыннаах “Туругуруу ыһыахтарын” сценарийдарын суруйан, дьон-сэргэ сэҥээриитин ылар.
2000 сылтан Зоя Гаврильевна Ойуунускай аатынан Саха академическай тыйаатырын уонна Олоҥхо тыйаатырын артыыһа. Олоҥхо тыйаатырыгар Зоя Гаврильевна инсценировкаларынан Иннокентий Теплоухов-Тимофеев “Кулун Куллустуур”, Прокопий Ядрихинскай “Дьырыбына Дьырылыатта”, Николай Степанов-Ноорой “Күн Эрили” олоҥхолоро, “Бэйбэрикээн эмээхсин” остуоруйа испэктээк буолан, ситиһиилээхтик тураллар.
2014 сыллаахтан Олоҥхо ыһыахтарын аһыллыытын уонна түмүктүүр түһүмэҕин сценарийдарын суруйсубута.
Зоя Гаврильевна саха киинэтигэр элбэх оруоллардаах. Олортон саамай чаҕылхайдара 2018 сыллаахха “Тойон Кыыл” Василий Яковлев суруйбут сэһэнинэн, драматург Семен Ермолаев- Сиэн Өкөр сценарийынан, режиссер Эдуард Новиков киинэтэ буолар. Бу киинэ 40-с Москватааҕы Норуоттар икки ардыларынааҕы киинэ фестивалын (ММКФ) “Кыһыл көмүс Сибэтиэй Георгий” –ын ылбыта, фестиваль Гран-при лауреата буолбута.
Ытыктабыллаах Зоя Гаврильевна тыйаатыр уонна киинэ артыыһа, маны сэргэ хоһоонньут уонна тылбаасчыт. Үтүөкэн киһибит үбүлүөйүн көрсө «Көҥөс иэйии” уонна “Пьесалар тылбаастара” диэн икки кинигэни бэлэмнээн таһаарда.
