Бу күннэргэ Саха театрын салалтата улуустар баһылыктарын кытары бииргэ үлэлэһэр туһунан кэпсэтиилэри ыытта. Ол курдук сэтинньи 9 күнүгэр Үөһээ Дьааҥы улууһун баһылыгын Владислав Ивановы кытта көрсүһүү буолла, кэпсэтии сааскы гастроллар тула барда.
Эдэр баһылык Владислав Михайлович улууһун дьонугар-сэргэтигэр, чуолаан үүнэр көлүөнэ кэнчээри ыччатыгар норуоппут духуобунай култууратын тиэрдэр, төрөөбүт төрүт тылбытын харыстыыр, сайыннарар туһугар ыытар үлэтин билиһиннэрдэ.
Театрбыт салалтата эдэр баһылык тылын-өһүн истэн, чахчы улууһун култуурата сайдарын, төрөөбүт тылбыт инники дьылҕатын туһугар болҕомтотун уурар салайааччы кэлбит диэн үөрэ иһиттилэр.
Бу саас театрбыт артыыстара Үөһээ Дьааҥы улууһун нэһилиэктэрин төһө кыалларынан барыларын хабан испэктээкиллэри көрдөрүөхтэрэ, олохтоох нэһилиэнньэни кытары көрсүһүүлэри тэрийэн, Үөһээ Дьааҥы дьонун-сэргэтин сэргэхситэн кэлиэхтэрэ диэн эрэнэбит.
