Сэтинньи 10 күнүгэр Саха театрын салалтата Бүлүү улууһун баһылыгын Сергей Винокуровы кытары көрүстэ.
Кэпсэтиигэ Сергей Николаевич:
“Култууратын, духуобунаһын өрө туппут норуот сайдар кэскиллээх буолар. Киэн туттар биир дойдулаахпыт, биллиилээх политическай уонна судаарыстыбаннай диэйэтэл, Саха автономнай республикатын тэрийсибит чулуу киһибит Степан Аржаков аатын үйэтитэр туһугар, кини олоҕун уонна саха норуотугар оҥорбут дьыалатын сырдатар испэктээкили Саха театрын сыанатыгар туруортарыахпытын баҕарабыт” диэн испэктээкил турарыгар улуус дьаһалтата өйүүрүн биллэрдэ.
Театр салалтата баһылык этиитин ылынан, 2024 сылга уһулуччулаах дьон олоҕун сырдатар испэктээкиллэр кэккэлэригэр Степан Аржаков сырдык аатын үйэтитэр туруорууну былааҥҥа киллэрдэ.
Быйыл “Сааскы гастролларга” тиийэ сылдьан, Бүлүү улууһун дьаһалтатын кытары бииргэ үлэлэһии туһунан кэпсэтиибит олоххо киирэн, Сергей Николаевич уонна Саха театрын дириэктэрэ Петр Макаров сөбүлэҥ түһэрсии докумуонугар хардарыта илии баттаатылар.
