Мэҥэ Хаҥалас улууһугар олоҥхо ыйын чэрчитинэн СӨ үтүөлээх артыыската, режиссер, худуоһунньук, олоҥхону толорооччу Софья Иннокентьевна Баранова Майа Д.Ф.Ходулов аатынан култуура киинигэр Мэҥэ Хаҥалас Хаптаҕай нэһилиэгин олоҥхоһута П.Г.Романов -Мыланыыскай «Кыыс Ньургустай» олоҥхотун толорон олоҥхо дьоро киэһэтин бэлэхтээтэ.

Быйыл П.Г. Романов -Мыланыыскай 130 сылынан олоҥхото киэҥ эйгэҕэ тарҕанна. Софья Иннокентьевна олоҥхону ураты тыыннаан толоруутун истээччилэр дуоһуйа иһиттилэр. Олоҥхо персонажтарын ырыатын тойугун кэрэтин сэргээтилэр, астыннылар.

Софья Иннокентьевнаҕа культура уонна духуобунай сайдыы управлениетын методиһа Павлова Э.М. Мэҥэ Хаҥалас улууһун эҕэрдэ суругун туттарда, Г.Г.Колесов аатынан Олоҥхо дьиэтин салайааччыта Иванова Е.Н. «Үйэлээх үгэһи үксэтээччи” үрүн көмүс бэлиэни 5 N-дээх удостоверениены туттарда, Хаптаҕайтан Романов-Мыланыыскай биир дойдулаахтара, Мыланыыскай аймахтара махтанан сибэкки дьөрбөтүн туттардылар, биир дойдулаахтара Ходоро нэһилиэгиттэн, аймахтара, бииргэ үөрэммит  кылааһынньыктара эҕэрдэлээтилэр.

Мэҥэ Хаҥалас олохтоохторо дьоро киэһээни бэлэхтээбит Софья Иннокентьевнаҕа саха олоҥхотун тарҕатар, сайыннарар айар үлэтигэр үрдүктэн үрдүк ситиһиилэри, кытаанах доруобуйаны, махталлаах көрөөччүлэри, дьоро олоҥхо киэһээтин бэлэхтээбитиригэр дириҥник махтаннылар!