Платон Алексеевич Ойуунускай төрөөбүтэ 130 сылыгар аналлаах “Саха омук салбырҕастаах санаатын, саталаах саҥатын саҥарыаҕыҥ” диэн уопсастыбаннас “төгүрүк остуола” СӨ Бырабыыталыстыбатын 1-кы нүөмэрдээх дьиэтин Өрөспүүбүлүкэ саалатыгар ыытылынна. “Төгүрүк остуол” Былатыан Ойуунускай өрөспүүбүлүкэбит сайдыытын “Сүүс сыллаах улуу былааныгар” көрүүлэрин тула буолла, тэрээһин кыттыылаахтара кэнчээри ыччакка Былатыан Ойуунскай хаалларбыт духуобунай нэһилиэстибэтин тириэрдии, кини сырдык аатын үйэтитии туһунан санааларын эттилэр.
СӨ Ил Түмэн судаарыстыбаннай мунньаҕын бэрэссэдээтэлэ Алексей Еремеев киирии тылыгар Былатыан Ойуунускай саха норуотун сайдыытыгар оҥорбут сүҥкэн кылаатын, кини аатын уһулуччулаах суолтатын туһунан иһитиннэрдэ, итиэннэ оҥорбут чулуу дьыалатын бүгүҥҥү ыччакка тиэрдии, Былатыан Ойуунускай аатын үйэтитиигэ салгыы ханнык үлэлэр ыытыллыахтаахтарын туһунан анаарда. СӨ Бырабыыталыстыбатын бэрэссэдээтэлин солбуйааччы Сергей Местников Саха Өрөспүүбүлүкэтин сүрүн тэрээһиннэрэ Былатыан Ойуунускайы кытта ыкса ситимнээхтэрин бэлиэтээтэ.
СӨ Бырабыыталыстыбатын бэрэссэдээтэлин солбуйааччы Аскалон Семенов “100 сыллаах былаан” тула өрөспүүбүлүкэ бары улуустарын кэрийэн дьон санаатын истэн 2022-2122 сыллааҕы саха норуотун сайдыытын былаанын оҥорбуттарын иһитиннэрдэ.
Былатыан Ойуунускай төрдүн-ууһун туһунан сиэн балта Саха норуодунай суруйааччыта, Былатыан Ойуунускай аатынан СӨ судаарыстыбаннай бириэмийэтин лауреата Елена Слепцова-Куорсуннаах иһитиннэрии оҥордо. Саха сирин суруйааччылларын Сойууһун бэрэссэдээтэлэ, Чолбон сурунаал бас эрэдээктэрэ Гаврил Андросов Былатыан Ойуунускай уонна аныгы кэм туһунан санааларын үллэһиннэ. Сахалартан маҥнайгы философ-учуонай А.Е. Мординов төрөппүт кыыһа, ХИФУ бочуоттаах бэтэрээнэ, Платон Алексеевиһы тыыннааҕар көрбүт Галина Мординова Былатыан Ойуунускай туһунан киһи уйадыйар ахтыытын оҥордо.
Таатта улууһун баһылыга Айаал Бурцев Орджоникидзе болуоссатыгар Былатыан Ойуунускай аатын иҥэрии туһунан тыл көтөхтө. Бүгүҥҥү сугулааҥҥа учуонайдар, суруйааччылар, уопсастыбаннас бэрэстэбиитэллэрэ Былатыан Ойуунускай аатын үйэтитиигэ санааларын эттилэр.
Саха норуодунай суруйааччыта Сэмэн Тумат Былатыан Ойуунускай 1960-с сылларга тахсыбыт талыллыбыт айымньыларын саҥалыы таһаарыыны ситиһэргэ тыл эттэ уонна билигин пааматынньыга турар Орджоникидзе болуоссатыгар Ойуунускай аатын иҥэрэрии боппуруоһун быһаарарга Таатта улууһун баһылыгын өйөөтө. Күн бүгүн саха духуобунай лиидэрин Былатыан Ойуунускай аатын сүгэр алта тэрилтэ баар: Литературнай музей, Аан дойдутааҕы “Дьокуускай” аэропорт, Таатта народнай театра, Чөркөөхтөөҕү судаарыстыбаннас музейа, Чөркөөх орто оскуолата уонна Саха академическай театра.
