Абаҕаҕа биир дойдулаахпыт РСФСР, Саха АССР үтүөлээх артыыһа, режиссер Федот Федотович Потаповка сүгүрүйэн Саха театрын артыыстара «Ситим быстыбат” диэн театр киэһэтин бэлэх ууннулар. Чех суруйааччыта Карел Чапек «Ийэ», Чингиз Айтматов «Ийэ сирэ» уонна А. Островскай «Ойуур» испэктээкиллэртэн быһа тардыылары көрдөрдүлэр.
«Ийэ» испэктээкилгэ төрөппүт түөрт уолун, кэргэнин сүтэрбит тулуурдаах ийэ уобараһын Саха сирин норуодунай артыыската, сыана маастара Зоя Петровна Багынанова уонна Ч. Айтматов «Ийэ сириттэн» быһа тардыыга Елизавета Потапова Ирина Никифоровналыын толорбут оруолларын билиҥҥи аймалҕаннаах кэмҥэ көрөөччүлэр чугастык ылынан уйадыйдылар. Аҕа оруолун толорбут Илья Стручков, уолаттар оруолларын толорбут Айсен Лугинов, Алдан Готовцев, Илья Портнягин, Эдуард Захаров, Павел Ченянов итэҕэтиилээхтик оонньоотулар.
Театр эдэр артыыстарын толорууларыгар тэтимнээх ырыалар ылланнылар. Нэһилиэкпит баһылыга Семенов Максим Владимирович Зоя Петровнаҕа уонна Елизавета Федотовнаҕа олохтоохтор ааттарыттан махтанан, айар үлэлэригэр ситиһиилэри баҕаран туран өйдөбүнньүк бэлэхтэри туттарда. Ытык ыалдьыппыт Зоя Петровна кыыһынаан Елизавета Федотовналыын уонна Айсен Лугиновтыын испэктээк кэнниттэн оскуола оҕолорун кытта көрүстүлэр. «Эһиил Аммабыт сиригэр Олнхо ыһыаҕа ыытыллаары турар. Театр эйгэтиттэн олонхо тиэмэтигэр олох чугас турар биһиги биир дойдулаахпыт Федот Федотович Потапов буолар диэтэххэ сыыспаппыт буолуо»,- кэпсэтиини саҕалыыр саха тылын учуутала Н.Н. Белолюбская.
«Федот Федотович 1976 сыллаахха «Дьулуруйар Ньургун Боотур» операны режиссердаан туруорбута. Опера үс састаабынан турбута. Ньургун Боотуру оонньуур Матвей Лобанов хараҕынан көрбөт буоллаҕа дии. Уот Уһутаакылыын охсуһууларыгар бэйэн киирэн биэрэн ис, оччоҕо таба охсуоҕуҥ» — диэн режиссер Федот Федотович сүбэлиирэ. Кыыс Кыскыйдааны наһаа үчүгэйдик Марина Попова толорбута. Артыыс киэнэ атамаана кини этэ. Абааһы кыыһын оруолугар олох боруоста имигэс баҕайытык оонньообута. Биллэр артыыстартан Туйаарыма Куону Анегина Ильина, Мария Николаева уонна Нина Сазонова, үс бэртээхэй ырыаһыттар ыллаабыттара.Ньургун Боотуру Иван Степанов, Николай Баскаров уонна артыыс буолбатах, хирург быраас Степанов ыллаабыттара. Наһаа успехтаахтык барбыта. Сити кэмҥэ Семен Оконешников уонна Иван Степанов Свердловскай консерваториятын сана бүтэрэн кэлбит эдэркээн солистар, ыллаан, сүрдээх үчүгэй опера турбута. Федот Федотович колхуоһунай театрга үлэлии сырыттаҕына дьиҥнээх норуокка баарын курлук олоҥхону Устин Нохсоороп Емельяновкаҕа кыстык ферма дьонугар толорбутун истэн турабын диэн астынан кэпсиир этэ. Кылгастык кэпсээтэххэ итинник» — ахтар Зоя Петровна.
«Мааска» оҕо театрын иитиллээччилэрэ, атын да театры сэнээрэр оҕолор элбэх ыйытыыны бэлэмнээбиттэр. Зоя Петровна, Елизавета Федотовна уонна Айсен Николаевич оҕолор артыыс идэтин, үлэтин туһунан ыйытыыларыгар толорутук эппиэттээтилэр, истин көрсүһүүттэн үөрдүлэр.
Надежда ЯКОВЛЕВА.
