Театрбыт баай историятын кэрэһэлиир, үлэлээн ааспыт, үлэ үөһүгэр сылдьар ытык артыыстарбытын үйэтитэр Саха театрын антологията үс чааһынан тахсыбыта бүтүн Саха театральнай искусствотын сайдыытын хас биирдии ааҕааччыга тиэрдэр дьоһун бэлэх буолбута.

Бу Саха култууратын, искусствотын историятыгар сүҥкэн суолталаах үлэни Ил Түмэн Бэрэссэдээтэлин бастакы солбуйааччыта Александр Николаевич Жирков иилээн-саҕалаан салайбыта.

Театр биир сиргэ турбат сайдар, саҥа испэктээкиллэр тураллар, саҥа оруоллар оонньоноллор. Театр антологиятын салгыыр Саха театрын айар үлэтин 2010-2011, 2011-2014, 2014-2017 сыллар кэрчик кэмнэрин хабар кинигэлэр тахсыбыттара.

Дойду үрдүнэн сатыылаабыт хамсык ыарыы пандемиятын кэмигэр тохтообут үлэ сөргүтүллэн быйыл 2024 сылга саҥа 2017-2024 сыллардааҕы үлэни сэһэргиир төрдүс кинигэ күн сирин көрөр буолла.

Кинигэ тахсыытыгар үлэлиир бөлөх ааптар Александр Николаевиһы кытары көрсөн үлэ торумун бигэргэттэ.