Саха театра 118-с театрын дьылын от ыйын 12, 13, 14 күннэригэр эдэр драматург Утум Захаров пьесатынан “Маһары. Ыраахтааҕыга айан” испэктээкил премьератынан түмүктүөҕэ.
Бу испэктээкил Саха театрын “Умнуллубут ааттары төнүннэрии” биир сүрүн хайысхатынан туруорулунна. История чахчыларын кэпсиир дьоһуннаах үлэнэн дьыллааҕы үлэ түмүктэнэрэ үгэскэ кубулуйан эрэр.
XVII үйэҕэ аан бастаан сахалартан Арассыыйа ыраахтааҕытыгар Хаҥаластан Тыгын сиэнэ, Бөдьөкө Бөҕө уола Маһары, Намтан Ньыыкка уола Нохто, Мэҥэттэн Быйаҥ уола Тирэх кинээстэр Саха сирин бэрэстэбиитэллэринэн талыллан тиийэн көрдөһүүлэрин, бэйэлэрин этиилэрин тиэрдибиттэрэ. Ол алта ыйдаах уһун унньуктаах улуу айан уонна Москуба Күрүөмүлүгэр Федор Алексеевич күн ыраахтааҕыны кытта көрсүһүү туһунан айымньы тыйаатыр сценатыгар аан бастаан кэпсэнэр. Маһары кинээс аата ол кэмтэн ыла үрдүктүк ааттанар буолбута. Оттон кэнники икки сылга, көмүллүбүт көмүс уҥуоҕун булуохтарыттан, кини аата эмиэ дьоһуннаахтык ааттанар буолла. Ол Маһары кинээс Саха сирэ Арассыыйалыын бииргэ олорор-үлэлиир сибээһин бастакынан олохтоон, тас дойдулары, норуоттар икки ардыларынааҕы хардарыта сыһыаннарын саталлаахтык тэрийэн саҕалаабыт саха чулууларыттан биирдэстэрэ буоларын санатан билиҥҥи кэм-кэрдии кини аатын өрө анньан таһаардаҕа.
Маһары, сүрүн оруолу СӨ үтүөлээх артыыһа Петр Макаров, Нохто оруолун СӨ норуодунай, Арассыыйа үтүөлээх артыыһа Петр Баснаев, Тирэх оруолун СӨ Култууратын туйгуна Николай Протасов толороллор.
Туруорааччы режиссер СӨ ускуустубатын үтүөлээх диэйэтэлэ Сергей Потапов.