Олунньу 21-22 күннэригэр Улуу убайбыт П.А.Ойуунускай уутуйан үөскээбит ытык түөлбэтигэр Чөркөөххө Саха академическай театрын артыыстара икки күнү биһиэхэ анаатылар.

Ол курдук, бастакы күн сүрэҕи нүөлүтэр Карел Чапек драматынан “Ийэ” испэктээги көрөн мустубут дьон дууһабытын таарыйтаран, харах уулаах буоллубут. Бу айымньы сүрүн ис санаатын, дириҥ суолтатын саха народнай артыыската Зоя Петровна Багынанова толору арыйда. Кини сөҕүмэр талааныгар мустубут дьон сүһүөхпүтүгэр туран “браво” диэн махталбытын тиэртибит, астыммыппытын биллэрдибит.
Театр эдэр чаҕылхай артыыстарыттан олуһун астынныбыт. Бу курдук саха театра үйэлэргэ үөрүүнү, дуоһуйууну бэлэхтии турдун, сахабыт тыла сүппэтин🙌

Бондарева Мариетта Петровна, П.А.Ойуунускай аатынан Чөркөөх орто оскуолатын саха тылын уонна литературатын учуутала