Театр алыптаах эйгэтин сэгэтэр сынньалаҥ түгэҥҥитин мүччү тутумаҥ!

*****

Былатыан Ойуунскай аатынан Саха театрын артыыстара үгэс буолбут Сааскы гастроллартан кэлэн, муус устар 5 күнүттэн тапталлаах көрөөччүлэригэр анаан испэктээкиллэрин көрдөрөн саҕалыахтара. 

Бу ыйдааҕы репертуарга Саха театрын сүрүн режиссера Руслан Тараховскай туруоруутугар саха уус-уран литературатын бастыҥ айымньылара киирдилэр. Алампа хоһооннорунан ырыалаах-тойуктаах “Таптал”, ааспыт араллааннаах дьылларга төрүт омуктар олохторун сэгэтэн көрдөрөр Далан “Тулаайах оҕо”, А.Н. Островскай аатынан Ленинградтааҕы театральнай институкка артыыс идэтигэр үөрэнэ барбыт саха устудьуоннарын ыар дьылҕаларын туһунан Иван Гоголев “Кэрэ көмүскэлигэр”, уос номоҕор киирбит саха кэрэ куотун туһунан Иван Алексеев “Суоһалдьыйа Толбонноох”, Саха сиригэр автономияны аҕалсыбыт биллиилээх общественнай диэйэтэл Исидор Бараахап туһунан  Дмитрий Наумов “Бүгүн эбэтэр хаһан да…” испэктээкиллэр көстүөхтэрэ. Ону сэргэ эдэр уонна кырдьаҕас көлүөнэ бүппэт мөккүөрүн биир ыал олоҕунан көрдөрөр Освальд Заградник “Охсор чаһыы дуораана” испэктээкилэ буолуоҕа.

Саха театрын Уус-уран салайааччыта, режиссер Андрей Борисов туруоруутугар Тихон Семушкин чулуу айымньытынан ааспыт үйэ саҕаланыытыгар  хотугу норуоттарга Сэбиэскэй былаас кэлиитин көрдөрөр “Алитет хайаҕа күрүүр”, ааптар көрдүүр суруллубатах пьеса алта дьоруойун уустук дьылҕатын сэһэргиир  аан дойдуга аатырбыт драматург Луиджи Пиранделло “Театрга буолбут түбэлтэ”, билиҥҥи кэм суруйааччыта Александр Седалищев дьиҥ олоххо буолбут суут дьыалатыгар олоҕурбут “Таптал сүппүт куората” испэктээкиллэрэ көстүөхтэрэ.

Биллиилээх режиссер Сергей Потапов туруоруутугар  нуучча улуу драматура Александр Островскай “Ойуур”,  Саха норуотун уһулуччулаах тириэньэрин Д.П.Коркин тустууга анаабыт олоҕун көрдөрөр Утум Захаров  “Коркин. Андаҕар” испэктээкиллэрэ буолуохтара  

Муус устардааҕы репертуар нуучча суруйааччыта Борис Васильев “А зори здесь тихие…” аатырбыт сэһэнинэн режиссер Роман Дорофеев туруоруутугар “Сарсыарда.Уу чуумпуга” сэрии драматынан саҕаланыаҕа.

Күндү көрөөччүлэрбитин  театрбыт бастыҥ испэктээкиллэрин көрөргүтүгэр ыҥырабыт! Театр алыптаах эйгэтин сэгэтэр сынньалаҥ түгэҥҥитин мүччү тутумаҥ!